Hobennan di SVT malcontento pa falta di salario

E diesun (11) hobennan cu dos luna atras a cuminsa cu e trayecto di Formacion Social ta sumamente malcontento. Dos luna despues ainda nan no a ricibi nan salario, pa cual dialuna mainta a dicidi di sali pafo di Marinierskazerne pa expresa nan malcontento.

Redaccion di 24ora.com tabata presente na e base di SVT na Marinierskazerne (Savaneta), pa atende cu e informe di e malcontento aki. Bureau Formacion Social ta encarga cu e proyecto di SVT (Sociale Vormings Traject) cu ta bou guia di Jessica Ras.

El a splica cu e problema aki ta algo cu semper e participantenan ta confronta cun’e na inicio di nan participacion den SVT.

 

Ras a splica cu e hobennan tabata desmotiva pa e falta di pago. Pero for di inicio a wordo splica na e grupo cu a drenta dia 2 di april ultimo, cu nan pago ta wordo haci via di un MB, via di Gobierno, pa cual den e prome lunanan e retraso ta inevitabel.

Minister di Asuntonan Social Glenbert Croes ta na altura di e problema y ta haciendo lo maximo cu Departamento di Finanza pa yega na e pago mas lihe posibel.

E coordinador di e proyecto a sigura e hobennan cu nan lo haya nan salario. E ta algo cu no ta poni den e payroll di Gobierno pero ta wordo haci via di un MB y esaki ta causa cu e tin un tardansa. “Mi mes a papia cu e hobennan y a bisa nan pa tene un poco di pasenshi, cu nan lo haya nan pago.”