Diahuebs anochi a tuma luga e debate di Parlamento Hubenil na Universidad di Aruba, unda cu 10 hoben di diferente edad a participa.
Fundacion Amigonan di Archivo tin e proyecto di Boy Ecury y hunto cu Parlamento Hubenil a organisa e debate di cual e hobennan a toca diferente tema. Parlamento Hubenil y Fundacion Amigonan di Archivo tabata contento di mira cu e debate tabata un exito.
Pa a yega na e topico di debate cu e topico di Boy Ecury, segun Daniella Britt, coordinador di proyecto di archivo di Boy Ecury 2018, Archivo Nacional Aruba tin un coleccion warda desde añanan 90 di e famia Ecury. E aña aki ta reconoce e “Jaar van Verzet”, esta e aña di resistencia pa un fondo grandi di Hulanda vFonds (Fonds voor Vrede, Vrijheid en Veteranenzorg). Fundacion Amigonan di Archivo a presenta un proyecto na nan riba resistencia, Boy Ecury y esaki a pone cu mester a organisa algo. Esey a pone cu poco poco e proyecto a yega na un forma y awo a pone disponibel pa publico.
E fundacion no tabata kier solamente bin cu e parti di investigacion so, pero e parti publico unda cu awo por haya na Archivo Nacional Aruba un guia di investigacion cu e historia di Boy Ecury. Pa nan esaki tabata hopi importante unda cu por mira e proyecto biba. Un di e formanan cu por a haci esey, ta den forma di e debate riba topiconan cu ta recorda Boy Ecury.
Daniella Britt a presencia algun training di e hobennan aki y ta contento cu nan a crece den un par di dia. Yolanda Richardson di Universidad di Aruba a duna e training na e hobennan. El a expresa di ta orguyoso di e hobennan con nan por a expresa nan mes, con nan por a mira e publico presente pero tambe con nan a siña diferente strategia y trece nan puntonan padilanti.
Na final di e debate e hobennan Camron Panthophlet, Emanuel Koolman, Giovanna Carisal, Leonardo Figaroa, Joshua Tromp, Minouche Riuz, Samuel Jones, Chloe Riuz, Dominique Lopez y Sherona Manuela a ricibi un certificado di nan participacion den e debate, tambe nan a ricibi un ticket pa cinema. Tur hoben a traha duro pa asina nan por a debati riba 3 ponencia, unda cu cada uno a trece padilanti nan argumento sea e tabata algo personal of di un investigacion haci.
E ponencianan cu nan a trata tabata di “Nos no ta den guera, ta pakico nos tin cu enfoca riba paz y libertad”, “nos no ta consciente cu mester para keto y balora nos libertad” y “ta acepta inhusticia pasobra tin falta di curashi pa forma resistencia”.
