Hoben y adulto a siña mas di steelpan den tayer di 4 dia

Aruba PanMan Foundation hunto cu UNOCA Cares su programa a organisa un tayer / camp na Skol di Arte for di dialuna, 13 di juli, te cu diahuebs, 16 di juli.

E camp di steelpan tabata gratis pa tur participante y habri pa persona di tur edad, specialmente e hobennan, cu snacks, refresco y almuerso prepara pa Diana Clark y Eric Malmberg.

Docentenan Angel Hazel, Lee Connor y Nico Connor di Skol di Arte na San Nicolas, a duna e lesnan. Tambe nan ta duna les tur diaranson for di 3’or pa 4’or, di 4’or pa 5’or y di 5’or pa 6’or.  

A uza e cuater dianan pa desaroya musica, con pa lesa musica y musica di Pan, for di mainta te laat den oranan di atardi. A siña esaki riba diferente tipo di steelpan: alto pan, double pan, second pan, guitar pan, cello pan y tenor bass pans, y tur hende a haya un chens pa toca y disfruta di e musica produci.

Pa cera e camp / tayer, tur participante a ricibi un certificado di Aruba PanMan Foundation pa nan participacion y dedicacion na e instrumento di Steelpan y a yuda pa amplia y mantene e herencia di e cultural di steelpan na bida.

Aruba PanMan Foundation ta gradici UNOCA pa brinda e oportunidad aki na Aruba pa sigui promove musica di steelpan.