Tabata den ora trempan di diadomingo mainta, caminda c’un grupo di hoben ta yega hospital c’un persona cu a hoga den un pool na un cas na Palm Beach.
Vocero di polis, Lito Lacle a indica cu pa 6:05 am ta drenta un melding na Central di Alarma y despues via Centrale Post unda cu a meld cu’n persona lo a hoga na un luga na Palm Beach. Pa Cuerpo Policial tabata dificil pa defini unda precisamente e suceso a tuma luga. Despues di un rato, a drenta un melding via Hospital c’un grupo di hoben a yega cu e victima ya sin bida. Pa 6:42am, dokter ta constata morto di Daniel Perez, naci na Aruba, di 24 aña di edad.
Mesora e investigacion a cuminsa y Cuerpo Recherche a yega hospital pa asina interoga tur esunnan cu tabata den e pool hunto cu e victima pa descarta si tin un motibo penal tras di e suceso y pa por defini kico a pasa, ya cu esaki no tabata mucho cla. Al parecer e hobennan mes a purba di duna e victima CPR pero cu tabata envano y despues nan mes a dicidi pa trece hospital.
E hobennan no por a splica unda precisamente nan tabata kedando, cu a haci cu tabata dificil pa un patruya bay n’e sitio. Un rato despues nan mes a yega hospital cu e victima ya sin bida.
Tin tur indicacion cu entre e grupo di hoben nan a huur un cas na Palm Beach. Mesora a schakel in Slachtofferhulp pa asina informa e famia di e victima di e suceso lamentabel aki. Por a compronde cu esaki tabata un shock p’e mayornan na momento cu nan a haya e yamada, mirando cu nan no tabata sa cu nan yiu a sali fo’i cas. Headlines Group ta manda palabra di forsa p’e famia di e fayecido.
