Diadomingo anochi, net despues cu a caba di kima e “Momo” riba Harbour Arena, net banda di Coney Island, un homber a yega eynan na sanger bisando cu nan a hinke den garganta cu un sker. Mesora a start un investigacion y a resulta cu e sospechoso tabata den Belgiestraat mes na altura di oficina di FCCA. Ey amigonan di e victima a maltrat’e y Polis a detene mesora. E victima a bay cu ambulance pa Hospital pa ricibi tratamento medico.
Investigacion a cuminsa for di na e sitio mes y a sali afo cu e sospechoso ta Junior Gross miho conoci pa su amigonan como “Coco” di apenas 16 aña di edad. E victima tin 22 aña di edad. Kico ta a motibo cu a conduci na e hincamento ainda no ta mucho bon conoci.
E pareha di e sospechoso, cu tambe tabata eybou cune ora cu a detene, despues a bira malo y a transport’e cu ambulance pa Hospital. Bale la pena resalta cu e hobencita ey tin apenas 14 aña di edad y tabata meti den e ora di anochi ey na e pelea cu su “guy”.
Polis awor ta haciendo un investigacion pero hecho ta cu e hoben di apenas 16 aña di edad awor ta sinta cu un acusacion criminal pisa riba su cabes, di intento di asesinato. Ta depende con Fiscal di Ministerio Publico ta mira peso di e caso, cu e lo dicidi di laga e hoben den libertad debi na su edad hoben of e por opta pa persigui’e numa como adulto, specialmente si su “strafkaart” ta yen caba.
