Hoben di 12 aña birando mas malo: Keho serio riba cuido medico

Departamento di Noticia di 24ora.com a wordo aserca door di un ciudadano kende kier a expresa su preocupacion pa e falta di atencion y cuido cu el a experencia of ta experenciando cu su sobrina di 12 aña.

El a conta cu su sobrina a cuminsa haya un sangramento na su orea. A bay dokter di cas dos biaha cu e hoben, a bay Prome Auxilio dos biaha y specialista un biaha. Te awor, ningun por a duna e famia un contesta di kico ta pasando.

“Dado momento nos a bay cerca dr. Vallejo riba nos mes pa mira si un di dos specialista lo por yuda nos sali di e preocupacion grandi cu un mucha di 12 aña.” Tristo ta cu den e proceso aki di cana di un dokter pa otro, el a perde su oido y e sangramento na su orea a sigui. “Despues cu el a cay flauw 2 biaha riba diahuebs anochi, nos a dicidi di core hib’e Eerste Hulp na Centro Medico San Nicolas, unda cu urgencia nan a mande hospital cu ambulance. A dicidi di interne pa sigui examin’e.”

E tanta a sigui splica cu, durante estudia di e mucha den hospital a haci varios test pero ningun por a saca afo kico ta locual e ta sufri di dje. “E contesta di e dokternan tabata simplemente cu pa nan tur cos ta bon y cu nan no sa kico e tin.” Despues el a cuminsa perde balans y awor no por ni cana mas. “Nos como famia ta hopi desapunta di e trato cu nos sobrino a haya y nos tin un dolor grandi den nos curason sabiendo cu el a drenta hospital canando y awor nos ta hay’e bek den un rolstoel, pasobra e no por ni para riba su pianan. Ta yena nos di hopi dolor pa mir’e yora y cu e no por compronde pakico e no por cana mas.”

Despues cu e famianan a keda insisti, na hospital nan a wordo bisa cu hospital no tin un dokter pa haci un balans test, sino te aki un siman. Mester simplemente sinta warda y mientrastanto e salud di e mucha di 12 aña ta sigui bay atras. Cada bes e tin mas dolor y ta perde balans mas y mas. E denuncia aki 24ora.com a ricibi ta uno hopi serio y casonan manera esaki ta hopi tin, unda cu dokternan no por saca afo kico un pashent bin y ta laga nan bay cu e mensahe “bolbe aki un aña bek pa nos bolbe haci un test”.

Comments

comments