No ta un secreto cu na Monplaisir Basisschool ta caminda cu e hoben cu supuestamente lo a haci un of otro menasa riba rednan social of via Facebook of di un of otro forma, ta bishita.
Aki e ta hayando enseñansa. Na e scol, despues cu tur hende a haya sa di e situacion, a trece un preocupacion tambe cerca e mayornan cu tambe tin yiu ta bay scol. Nan kier sa con ta para cu nan yiu.
Kico ta e siguridad cu nan yiu tin nan scol despues di un situacion manera esaki y si e alumno aki mester bin bek na scol. Scol no a para keto.
Ya caba tin personanan di siguridad para pa asina duna un tiki refleho di mas siguridad y respet na porta di scol. Esaki ta un scol basico. E hoben encuestion, di 11 pa 12 aña a keda un dia cera y mientrastanto e ta den libertad. Mayornan ta puntra si e hoben aki lo bin scol bek, y ki garantia nan tin pa siguridad di nan yiu.
Esnan cu ta encarga cu maneho di scol a envolvi tambe otro departamentonan cu tin di haber cu enseñansa y siguridad den henter e proceso pa drecha loke kisas a bay robes. Ya caba nan tin contacto cu polis, cu departamentonan di Enseñansa cu ta responsabel pa situacionnan manera esaki.
Hopi trabao a wordo haci na Mon Plaisir Basisschool. Keto bay e trabaonan ta sigui. Mayornan di mes tambe a wordo notifica di un of otro forma via un medio di comunicacion. A informa nan loke ta pasando y decisionnan cu scol ta tumando p’asina evita un intrankilidad cerca e mayornan, cu ta preocupa. Esaki pasobra nan no sa ki siguridad nan yiu tin na scol. E situacion ta bao di control na e momentonan aki. E por ta un joke, of por ta e intencion por tabata serio. Pero scol no a tene cuenta cu ta joke of cu ta di berdad y simplemente a actua.
Esey ta netamente loke a pone tambe cu un of mas carta a bay pa mayornan, splicando nan kico ta pasando, kico ta bay sosode. Tambe a informa nan cu ta bay tin encuentronan cu mayornan den e proximo oranan p’asina percura pa e trankilidad reina atrobe. Tambe kier kita cualkier preocupacion of tension relaciona cu e sucedido caminda cu un of otro menasa a bay di un alumno di e scol aki, den direccion di un otro scol cu tambe ta den vecindario cual ta Colegio Arubano, y cual tambe a lanta su aspecto di siguridad mirando e menasa aki.
E hoben en cuestion, no sa si ta un joke of no. E no por bishita e scol aki mas por lo pronto. No sa si den futuro, pero por lo pronto e no ta bay bin scol aki mas. No sa si den futuro e lo bin bek of e lo wordo acomoda na un otro scol. Esey tampoco no sa.
Pero esaki sigur ta un eye opener y kisas un les pa otro scolnan y tambe un guia pa e hoben aki pa evita cu mañan e por bay den mal caminda. Ban spera cu tur cos caba nechi.
Vocero policial, Lito Lacle a comenta cu riba mas of menos 22 di december, Colegio Arubano a haya un mail, cu tin un persona cu tin pensa di haci un active shooting.
Dia 6 di januari a haya denuncia di e scol aki y dia 8 di januari a institui un team pa cuminsa traha riba esaki. E menasa aki polis a tum’e na serio.
Algun dia pasa a bay over na detencion di e persona cu ta tras di e menasa aki. Ta un mucha homber di apenas 12 aña di edad. A detene dialuna y diamars el a bay den libertad.
E detencion
Jeugdstrafrecht, lacle a splica, ta papia cu un mucha di 12 aña no por keda cera. A lag’e den libertad si, pero mester tene cuenta cu e ta bao di cierto condicion. E tin cu cumpli cu cierto rekisitonan di Ministerio Publico.
Con por mira e situacion aki
Tin cu tuma tipo di menasanan aki na serio. Trabao como Cuerpo Policial ta, bao liderazgo di Ministerio Publico, ta pa bay haci investigacion. Ta tuma esaki tur na serio y a yega asina leu pa tin suficiente prueba pa deten’e. Den e proceso cortico aki a interog’e y tambe testigonan. E trabao tambe di Ministerio Publico ta pa bay wak con leu of con serio e menasa aki ta. Ministerio publico por ehempel no ta haci’e su so. Por ta e tin cu haya un rapport di psikiatra, psicologo. Tur esaki e ta agrega pa wak con leu ta yega.
Siguridad na scol
Segun Lacle, durante un reunion cu scol a splica cu trendnan mundial di gang, por a ripara cu den decada di 70 tabata tin un tipo di gang. Y 30 aña despues na Aruba a haya e fenomeno aki.
Awor aki tin social media. E ta relativamente facil pa e mucha wak kico ta e trendnan mundial y purba di imita loke ta haci por ehempel manera na Merca.
Den esaki ta hiba charla na diferente scol cu tambe a hiba su fruto pa esaki. Mas scol splica kico ta e fenomeno aki, mas hende, mas docente, mas mentor, mas trahado social cu ta trahando na e scol por siña identifica e muchanan aki cu por tin algun problema mental of social cu por bay over na trata nan, si ta necesario door di un psicologo of algo.
Pero ta keda monitornan
Loke ta pusha den e scol pa e mentor, docente y e trahadonan social ta pa nan tin un miho relacion cu e studiantenan di tal manera cu si tin algo bayendo robes cu nan bati e bel mesora.
Con grandi e problema ta
E ta un problema grandisimo segun Lacle. Tin mas of menos 150 charla duna, di cual practicamente riba 100 charla ta riba e unico topico active shooting. Un di e lemanan ta, cu si bo sa algo, conta algo.
Tin biaha e muchanan mes ta bin dilanti cu nan problema social, problema mental, of hasta e docentenan ta conta loke nan ta haya nan mes den dje. No ta un situacion facil.
Nan ta bay e extra mile pa por yuda e muchanan aki. Hopi biaha e muchanan aki no ta uza algo. Por ta un problema mental of trauma cu nan a yega di haya den nan infancia, esaki ta cuminsa bin dilanti.
Lacle no ta un psicologo, pero ta nota cu na edad di 12 pa hasta 20 aña e problemanan mental ta bin dilanti. Esey no kiermen cu ta haya problema den scolnan secundario, pero belnan ta wordo bati pa cierto muchanan den scol basico, cu ta comporta na maneranan straño of peligroso.
Posibel solucionnan
Si mester di charla yama libremente pa cuminsa duna e charlanan aki y splica kico tin cu tene cuenta cun’e. Aruba ta bendiciona te ainda cu nada asina aki a yega di pasa.
Ta mira rond di mundo e ta pasando. No solamente na Merca, pero na otro paisnan. Miho ta al tanto pa por purba preveni. Mester purba di traha mas riba prevencion, cual ta e cos mas improtante.
No mester keda traha riba e parti represivo. Ban detene of ban cera. Ban purba evita esey tin cu bay purba di traha riba dje.
