Hopi mayor ta luchando cu nan yiunan cu e problema diabolico di Bullying of Termento cu ta pone muchanan sinti nan mes inferior y ataca pa discriminacion y racismo. Asina ta complica e mucha su bida, hiba nan na depresion y situacion desagradabel.
Pero nos mester recorda tur mayor dicon ta para skirbi den Efesios 6:4 cu mayor mester lanta su yiu den disciplina y instruccion di Señor, pasobra haciendo esey bo ta sembra balor y curashi den e mucha su bida:
Na prome luga, e mucha ta siña balora su bida, respeta tur hende, balora conocemento, balora sabiduria, balora bon relacion cu Dios y hende, balora su fe, balora oracion, balora husticia, balora almanan (stima hende), balora servicio, balora sacrificio y balora gratitud.
Dicon nos mester balora tur e cosnan ey? Pasobra ta esey ta e cosnan cu Cristo Hesus a balora y nos mester tin e actitud y mente di Cristo pa asina nos bira imitadornan di Dios( Efesionan 5:1-7 y Filipensenan 4:8+9).
Mateo capitulo 16:24 ta siña nos un strategia di bida cual Hesus a bisa; Si un hende kier bin mi tras,lag’e nenga su mes, hisa su cruz y sigui mi. Un bes bo tuma e decision ey orguyo y arogancia ta cuminsa aparta for di bo bida, pasobra bo ta canando den boluntad di Dios.
Bo a yega di puntra bo mes kico ta nifica bo ta un yiu di Dios? Tene bon cuenta: Bo ta crea den e imagen y semehansa di Dios, esey ta nifica bo tin un identidad solamente. Cual ta manifesta den e siguiente forma; bo ta stima y aprecia nos Tata cu ta den shelo. Bo ta acepta y reconoce Cristo Hesus como bo salbador personal. Bo ta biba pa Señor y cana den su boluntad.
Juan capitulo 1 vers 12+13 ta para skirbi: Ma tur esunnan cu a ricibiE na nan E a duna e derecho pa bira yiunan di Dios, esnan cu e kere den su nomber. Cu no a nace di sanger ni di boluntad di carni, ni di e boluntad di hende, ma di Dios. Hobennan no lubida Filipensenan capitulo 2 vers 10+11.
Galationan capitulo 3 vers 26 ta para skirbi : Boso tur ta yiu di Dios,door di Fe den Cristo Hesus. Ora bo ta yiu di Dios bo no por participa den nada di scuridad,of inmoralidad of cosnan cu Dios ta aborece, no laga ningun hende gaña boso hobennan lesa y memorisa Galationan 5:19-21 , Galationan 6 vers 7+8 y 1 Corintionan 6 vers 9).
Awor esunnan cu ta pertenece na Cristo a crucifica e carni cu su pasion y deseonan.(Galationan 5:24). Ora un hoben ta den Señor e ta haci tur cos sin critica ni murmura, y asina proba su mes di ta sin culpa y inocente, yuinan di Dios sin reproche, mey mey di un generacion corumpi y perverso.( Filipensenan
2:14-15).
Actualmente nos tur tin di reconoce cu bida di un hoben no ta facil, pasobra e enemigo a declara guera na hubentud, uzando tur tipo di trampa, hasta tecnologia y ciencia pa tene nan ocupa, pa nan no comunica cu nan mayor y tambe pa nan no sinti e necesidad di Dios den nan bida.
Pero como mayor sabi y responsabel, nos mester ta prepara 24/7 pa asisti nos yiunan cu e Palabra di Dios, cual ta kibra tur cadena di maldad, pa asina nan por avansa cu paso firme den nan futuro.
