Historico: E prome examen di Papiamento na nivel VWO

Diaranson ultimo na Colegio Arubano a tuma luga e prome examen di Papiamento na nivel VWO. Un total di 54 candidato bayendo VWO incluyendo algun candidato pa Landsexamen, a pasa e examen. Aña pasa a tuma luga e prome examen na nivel di HAVO unda dos klas a participa.

Mester menciona cu Examenburo a traha e examen aki. Na Colegio Arubano tin dos docente cu ta duna les di Papiamento na e nivel ey. Nan ta Swinda de Cuba, M.Ed y Zuleika Fernandes, M.Ed. Ambos tin e titulo di “Master in Education” specialisa den Papiamento.

Ta bon pa splica cu ta 3 aña pasa a inicia cu e materia Papiamento den “Bovenbouw” na HAVO y VWO na Aruba. Den HAVO e ta dos aña bovenbouw y na VWO e ta 3 aña (v6).

Aña pasa tabatin 2 klas di examen HAVO 5 y e aña aki 4. Esaki ta Colegio Arubano so, ainda tin Colegio San Nicolas.

Orguyosamente por anuncia cu e cantidad di alumnonan cu ta scoge Papiamento como “examenvak” a redobla!

Stichting Middelbaar Onderwijs Aruba (S.M.O.A.)a funda Colegio Arubano na aña 1959, pues 59 aña pasa. E tempo ey tabata Bisdom Curacao a percura pa esaki. Nan a cuminsa chikito den algun barak y 3 aña despues di nan apertura a muda pa e localidad actual situa na Vondellaan. Na aña 1972 a haya e prome Arubiano como Rector, den persona di Richard Harms. Despues a sigui Dolf Hoevertsz na aña 1979, sigui pa Hector Kolfin entre 1993 pa 2010. Ora el a baha cu pensioen, Jossy Tromp a tuma e funcion temporalmente pa 1 aña y despues entre 2013 pa 2015 atrobe, te ora cu e mes a baha cu pensioen. Actualmente Colegio Arubano ta buscando un Rector nobo. E scol ta conta cu mas o menos 2500 alumno y 100 docente.