Diabierna 9 di juli a tuma luga un ceremonia special na Papiamento Restaurant. Ta un ceremonia cu a bay den un bon ambiente compaña pa bahada di solo, biento fresco y poco awacero. Ta trata di famia Ling, cu a lansa nan buki “LING LEGACY A JOURNEY OF FAMILY, FOOD AND ONE HAPPY ISLAND.”
Sharlene Starke yiu muher di Yolanda Ling q.e.p.d. a conta e origen di e buki y di e fundacion, bou nomber di Jordan Ling Foundation. Tur fondo recauda por medio di e buki lo bay pa e dicho fundacion.
“E idea pa scirbi y publica e buki a nace cerca mi tanta Ingrid Ling, casa di mi tio Clifton. E intencion tabata pa hacie un publicacion priva pa famia, pa e keda como un recuerdo pa tur miembro di famia cu ta of tabata parti di e legado di famia Ling, pues un family book”, asina Sharlene a conta durante e ceremonia.
Sinembargo na aña 2015 mientras cu Ingrid tabata bezig cu e draft, e famia a ser enfrenta cu un dolor devastador. Nan primo Jordan, yiu di Clifton y Ingrid lamentablemente a tuma su mesun bida cu consecuencia di un sufrimento di deficiencia mental. Asina na aña 2016 a lanta “The Jordan Ling Foundation” pa promove actividadnan relaciona cu salud mental. E meta principal ta pa; yuda mas tanto posibel promove cuido di personanan cu ta sufri di salud mental aki na Aruba.
Despues Clifton Ling kende hunto cu su rumanan a tuma over e negoshi di su mayornan, a conta di e historia di su famia, kenda a yega Aruba na aña 1930 for di China. Tabata durante di e decada 1920 cu China tabata un republica nobo, despues di 2000 aña di dominio imperial. E pais tabata enfrentando retonan enorme cu nan economia, politica y bida social. China a keda devasta pa un guerra civil entre Kum Ming Tong (KMT) encabesa pa Chang Kai Shek y e partido comunista Chines (CCP).
Tur esaki tabata bou mando di Mao Zhe Dong. Segun Censo di e tempo ey; China tabata conta cu un poblacion di solamente mey milyon habitante. Den e decada ey China a conoce un periodo di hambruna, causa pa caos politico y un secura inmenso. “Mi papa a nace den un aldea chikito di Leelong cu awe ta un bario di e metropolis Shenzhen, e ciudad cu ta keda entre Hong Kong y China.
Siendo e yiu mayor di un famia di 10 yiu, e tabata esun encarga pa haci e biahe pa exterior cu e speransa pa un logra miho futuro, asina el a descubri Aruba.
Clifton Ling a sigui conta durante di su discurso cu, e caminda pa realisa e buki tabata basta turbulento pa motibo di e tragedia di nan yiu homber menor Jordan, kende nan ta dedica e obra di e buki y tambe pa e fundacion bou su nomber. Un danki ta bay na nos yiu homber Dustin y su grupo di amistad di Caribe Hulandes biba na New York cu a establece contacto cu e editor y esun cu ta publica, kende ta Willy Wong. Wong tin un gran conocemento di e material y acceso na e archivonan universitario den e region. Asina nos por a compila e historia di mi grandinan, e viahe, e documento- y potretnan cu ta sincronisa cu e texto skirbi den e buki. E ta simplemente un storia di un inmigrante cu kier a busca su futuro sin conocemento di kico esaki lo trece den un mundo nobo aki, cual ta na otro banda di e lama inmenso.
Un danki special ta bay na tur persona- y instancianan cu a contribui den cualkier forma, pa por a conduci den e logro aki. A entrega e prome ehemplar di e buki na director di Archivo Nacional, Raymond Hernandez. Nos ta spera cu e comunidad di Aruba les’e y gosa di dje!
