Nos kultura ta keda grabá den nos historia, ku ta e moveshon di nos pasado ku ta vislumbrá nos presente i proyektá nos futuro. Pa e motibu aki e selebrashon di dianan 1 i 2 yüli ta karga e tema; ‘Historia den Moveshon’ ku enfoke riba e área kultural, históriko i fraternal.
E dos dianan aki ta sumamente importante pa konstrukshon di nos pais. Nan ta forma parti integral di e programa di gobernashon. E aña aki ta kumpli, 155 aña Abolishon di Sklabitut riba dia 1 di yüli 2018 i alabes ta konmemorá e dia aki komo dia di Emansipashon. Riba e siguiente dia ku ta 2 di yüli 2018 ta hisa e Bandera pa di 35 biaha.
Gobièrnu di Kòrsou huntu ku e.o: Kas di Kultura, Fundashon Bon Intenshon, Plataforma di Sklabitut i Herensia di Sklabitut, Fundashon Rif, gruponan uniformá (J.C.C), gruponan hudisial i hopi mas a hinka un programa den otro pa huntu nos selebrá e dos dianan en grande.
Riba dia 1 di yüli ta baha e bandera di un forma solèm na Brionplein i ta warda esaki na Fort Amsterdam 17. Despues ta desvelá e korona artístiko rondó di e palu di bandera ku a keda trahá pa nos artista lokal sr. Giovanni Abath. Hóbennan di Excel Arts Academy, ganadó di ‘het Grootste Appeltje’ di Reino Hulandes, huntu ku sr. Abath ta bai presentá di un forma artístiko kada un símbolo ku ta pertenesé na e korona di triunfo, logro i perseveransia.
Dia 2 di yüli próksimo por mira e parada di gruponan uniformá i hudisial, momentu solèm di hisa e bandera, presentashon di nos kantante/ganadónan di nos festivalnan kultural i kondekorashon di nominadonan ku ta risibí nan Krus di Mérito pa e aña 2018 na Brionplein. Na altura di Molenplein tin posibilidat pa “meet & greet” nominadonan ku den pasado a keda kondekorá.
Alabes ta informá ku pareha Real lo tei presente na diferente selebrashon pa asina duna honor na nos bandera. Pa e parti ofishal di e seremonianan di bandera pareha Real lo ta presente e.o. na Brionplein i tambe na Parke Himno i Bandera Barber. Despues lo tin aktividat, e.o. festival i pueblo den Otrabanda ku vários presentashon kaminda pareha Real i dignatarionan lo tei presente.
Gobièrnu di Kòrsou ta invitá pueblo di Kòrsou pa huntu nos bin duna honor na nos bandera na Brionplein, den kayanan di Otrabanda, Barber i na otro aktividatnan festivo den e otro barionan.
