Hilton a anuncia plannan pa debuta un hotel na nivel “upscale”, conoci como e “all-suite” Embassy Suites by Hilton na Aruba pa aña 2021, sigui pa un acuerdo di maneho cu Natura Development II NV. E hotel ta programa pa habri medio 2021, e edificio di 330 suite oceanfront Embassy Suites by Hilton Aruba Resort, ta marca e di dos hotel di Hilton riba nos isla y ta reenforsa e plannan continuo di expansion di e compania den Caribe.
“E firmamento di Embassy Suites by Hilton Aruba Resorts, ta subraya e compromiso di Hilton pa expande su portfolio den Caribe,” asina Vice Presidente di Desaroyo den Caribe y Latino America, Juan Corvinos, a bisa. “Nos ta enfoca riba crecemento continuo den e region y ta trece nos marcanan principal di e industria pa destinacionnan top manera Aruba. Embassy Suites by Hilton Resort riba Eagle Beach lo ta un complemento maraviyoso na nos Hilton Aruba Caribbean Resort & Casino riba Palm Beach, extendiendo mas ainda nos hospitalidad na un area nobo di e isla.”
Embassy Suites by Hilton Aruba Resort ta yama bon bini na huespednan na e beachnan di Eagle Beach, un di e miho beachnan na mundo. Situa riba J.E. Irausquin Boulevard dilanti di e santonan blanco di Eagle Beach y aproximadamente seis miya for di aeropuerto, huespednan di e hotel lo disfruta di bistanan impresionante despeha di laman Caribe y di ta cerca na e atraccionnan principal , restaurant y luganan di entretenimento di e zona.
E compleho di construccion nobo di 8 piso y 330 suite na Aruba, lo conta cu suitenan espacioso y exclusivo di Embassy Suites by Hilton, ekipa cu un sala apart, un camber priva y un minibar cu microwave, minifridge y koffiepot. E compleho lo brinda un espacio flexibel pa reunion di 6 mil pia cuadra, un spa di mas di 3000 pia cuadra, piscina den aire liber, un gym y casino.
E hotel nobo lo ofrece un restaurant exclusivo, un bar y opcion di un grab-and-go dining pa un snack lihe. Huespednan tambe lo disfruta di servicionan exclusivo, cu ta inclui desayuno di cortesia prepara na bo gusto y recepcion anochi cu snacks y bebida.
“Nos ta spera pa traha hunto cu Hilton pa representa Embassy Suites by Hilton riba nos bunita isla di Aruba,” Fernando Fiano, representante di e propietario, Natura Development II NV a bisa. “E ubicacion di e hotel dilanti di Eagle Beach combina cu servicio y comodidadnan exclusivo. E suitenan amplio lo brinda e biaheronan un opcion comodo di alohamento di luho den e zona asina solicita, esta Eagle Beach.”
E hotel lo participa den Hilton Honors, e programa di huespednan di Hilton cu a gana varios galardon. Miembronan di Hilton Honors cu ta reserva directamente atrabes di e canalnan preferi di Hilton tin acceso na beneficionan instantaneo, incluyendo cu nan por eligi casi cualkier combinacion di punto y placa pa reserva un estadia, un descuento exlusivo pa miembro, WIFI standard gratuito y acceso na e aplicacion di celular Hilton Honors.
Actualmente Hilton ta conta cu un porfolio di casi 150 hotel y resort y ta ricibi huespednan cu brasa habri den 25 pais di Caribe y America Latina. E compania ta buscando activamente oportunidadnan di crecemento adicional y actualmente ta conta cu un desaroyo solido di mas di 80 hotel den henter e region. Pa mas informacion riba Embassy Suites by Hilton, porfabor bishita www.embassysuites.com y newsroom.hilton.com/embassysuites.
