Herment pa perfecciona nos idioma materno Papiamento

0

Pronto Aruba lo conoce un cambio den su sistema di enseñansa. Ta trata di implementacion di Scol Arubano Multilingual (SAM) den tur scol preparatorio y basico na Aruba. Nos idioma materno Papiamento lo haya un luga CENTRAL den enseñansa di Aruba.

Mirando cu den pasado mayoria di nos no a haya les di Papiamento na scol, maske Papiamento ta nos idioma materno, hopi di nos no por domina gramatica ni/of ortografia di Papiamento manera mester ta, como tampoco su vocabulario.

Awendia tin diferente material cu nos, como ciudadano, por uza pa educa/siña nos mes con pa haci uzo di Papiamento corectamente. Den e caso aki ta trata tanto di ortografia como di gramatica. Docente Maureen Luidens MEd ta recomenda pa ortografia e buki Vocabulario Ortografico di Papiamento, miho conoci como e Buki Blauw. Pa gramatica e ta recomenda pa uza e bukinan di Gramatica di Papiamento di Departamento di Enseñansa, tanto esun di Morfologia como esun di Sintaxis. Den e buki “Vocabulario Ortografico di Papiamento” bo ta haya mas di 17.000 palabra skirbi segun e reglanan describi den e map “Ortografia di Papiamento”. Alabes ta inclui den e buki un resumen di e reglanan di ortografia menciona. E buki aki ta un instrumento practico pa uzo diario y ta util pa tur hende.

E reglanan describi den e map “Ortografia di Papiamento” conhuntamente cu e lista di palabra den e Buki Blauw a keda aproba oficialmente pa Parlamento di Aruba na 2018. Pa medio di estudio di e dos bukinan “Manual di Gramatica di Papiamento”, Morfologia y Sintaxis, bo ta haya un bon conocemento di Gramatica di Papiamento. E bukinan aki ta trata respectivamente categoria di palabra y structura di frase den Papiamento. Studiando e tres bukinan menciona e lesado por perfecciona su conocemento di e reglanan di e idioma cu e ta uza como vehiculo di comunicacion, di pensamento y di expresion artistico. E bukinan menciona ta yuda e lesado conoce e reglanan di e idioma na un manera eficiente y lihe, pues nan ta util pa tur persona. Fuera di conocemento di e reglanan di ortografia y di gramatica, ta masha importante pa lesa masha hopi texto na Papiamento (buki, revista, corant etc.) pa por desaroya un miho  conocemento di e uzo practico di tur dia. Uza Papiamento corectamente no ta facil, pasobra generalmente mayoria di nos pueblo no a hay’e na scol pa sigui desaroy’e.

Algun tip pa desaroya Papiamento den corto tempo, segun Sra. Luidens, ta pa siña tiki tiki e uzo di Papiamento y pone esaki den practica di biaha. Tambe e ta conseha pa focus riba un parti specifico di e uzo di Papiamento. “Sea consciente ora di papia y skirbi Papiamento pa coregi bo mes”. Pa mas informacion por acudi na nos website [ea.aw] y busca SAM den e alfabetmenu. Tambe por sigui desaroyonan relaciona cu Enseñansa na Aruba a traves di facebook, twitter y Instagram @educationaruba.