Diahuebs, den oranan di atardi, algo prome cu 5’or, polis a wordo avisa di un accidente, caminda cu lo tabata tin tres hende herida. Polis a wordo manda cu urgencia y tambe e personal di ambulance a wordo manda riba e caminda di Malmok, direccion Arashi.
A resulta cu un Hyundai Tucson y un Jeep Wrangler tabata envolvi. E Hyundai Tucson cu tabata bayendo direccion Playa, pa un motibo of otro, chauffeur di e auto aki, na momento cu e Wrangler cora a brake su dilanti, e tambe a bay brake, pero na luga di primi brake, el a hera y primi trot. Esey a pone cu tabata tin un impacto basta fuerte di e Hyundai tras di e Wrangler cora.
Notabel ta cu e Wrangler no a haya practicamente ningun sla. Ora cu mira cuanto sla e Hyundai a haya, hasta e chauffeur a dal su cabes den e windshield y tabata sinti dolor. Muchanan den e auto a pasa den un susto, pero ningun di esnan cu tabata den e auto a keda herida cu heridanan di gravedad.
Mesora personal di ambulance, asina mes a atende cu esun cu tabata mustra cu kisas mester a haya atencion e momento ey. Mirando e situacion, takelwagen tabata necesario pasobra e Hyundai a keda cu hopi daño material. Polis a bin atende e asunto tambe. Companianan di seguro tambe tabata presente caba na momento cu polisnan a yega na e sitio. Un accidente riba e caminda di Malmok/LG Smith Boulevard. Eynan e accidente a sosode.
