September ta luna di cancer di mucha y ta conscientisa comunidad dedicando un luna completo na cancer di mucha. E fundacion tin poco informacion di cuanto mucha cu cancer ta bay exterior pa haya nan tratamento.
Na momento cu detecta esey ta drech’e mes ora, asina Lilian Prins, presidente di Wilhelmina Kankerfonds, a bisa. E criatura ta bay Hulanda cu su mama pa haya e tratamento necesario cu ta dura basta largo. E sa di casonan cu por dura un te cu dos aña cu e criatura ta keda den exterior hunto cu e mama pa haya e tratamento manera mester ta.
Despues di bin bek, e mucha ta keda na man di dokter te ora keda cla. Segun Prins, e sa cu dokternan ta keda den estrecho laso cu specialistanan pa ta informa di tur loke a sosode cu e mucha. Dokternan aki tin hopi preocupacion, ta dedica hopi tempo na e grupo aki. Hopi hende ta kere cu Wilhelmina Kankerfonds sa kende ta detecta cu cancer, pero ta haya sa ora un familiar acerca nan pa informacion of ayudo. E yudansa brinda te cuminsamento di juli 2020 tabata e pasashi di e di dos acompañante cu ta bay. El a sigui bisa cu e aña aki Aruba tin radioterapie y esey ta evita cu e personanan ta bay afo. Loke e fundacion ta haci si e cliente pidi ,ta duna e transport di cas pa IMSAN p’e haya radioterapie y despues bek pa cas, pero ta haci esey pa chemoterapie tambe.
Un cifra exacto di cuanto hende tin cancer nan no tin, ni e cantidad cu ta haya radioterapie. E estadistica cu Prins tin di personanan cu a pidi transporte, esaki no ta yega na dies. Tin e posibilidad cu ta bay cu auto propio, pasobra ora haya e radioterapia no ta sinti nada pero durante dia e persona tin di drumi, sosega e curpa. Ta yega un momento cu e curpa ta pidi sosiego. Prins ta pidi comunidad cu na momento di sinti algo pa papia cu dokter di cas. Tambe pa mira den famia si tabatin caso di cancer, por ta un familiar di edad por sa.
