Henley Davelaar, cu desde 23 di october a asumi e funcion di Director di Serlimar SG, a tene su prome conferencia di prensa pa aclaria e video pornografico cu a core den fin di siman via red social. El a admiti cu e video ta graba mas o menos 11 of 12 aña pasa y tabata priva, pero di un of otro manera a “leak” e tempo aya ma Corsou y awo cu el a bin traha na Aruba, ata e video ta coriendo rond na Aruba tambe.
Davelaar, cu recientemente a bini for di Boneiro, a pasa e proceso di reclutacion y e Hunta di Supervision di Serlimar a scoge, aunke e decision ey no tabata unanime. Por lo menos un di e miembronan di directiva, apunta pa Gabinete Wever-Croes, a vota contra su nombracion. Es mas, e directiva a haya tres nomber pa scoge for di dje, di cual ta tendiendo cu ta como 20 hende a solicita pa e funcion.
Henley Davelaar a bisa den e conferencia di prensa cu e ta haci masha dolor e video di dje cu e mes a graba teniendo relacion sexual. E tempo aya el a lek na Corsou y a haci’e hopi daño, tanto den su bida familar como tambe den su carera profesional. Esey mes probablemente tabata un di e motibonan pa a bay haci un carera nobo ma Boneiro.
Awo despues di mas cu 10 aña, el a dicidi pa bin traha na Aruba y e mesun “sex-tape” aki ta persigui’e. E ta sinti cu e video ta haci’e daño pasobra su subrinanan ta mir’e y nan ta consider’e nan heroe. Tambe e empleadonan di Serlimar, unda apenas el a cuminsa traha awo, ta haya nan confronta cu un grabacion asina di nan hefe nobo.
Davelaar a sigura cu e tin hopi smaak pa traha y hiba Serlimar padilanti. E compania tin diferente reto pero na mes momento e tin hopi oportunidad tambe.
