Cu e carta cu el a haya di Ministerio Publico dia 5 di maart ultimo den su man, Parlamentario Hendrik Tevreden a bisa cu e ponencia di prensa cu ta bay paga debe di Edison Briesen ta totalmente robes. El a indica cu e carta ta bisa cu, segun e investigacion haci, no tin posibilidad pa determina of papia cu tabatin malversacion.
E lider di fraccion MEP den Parlamento di Aruba a sigui splica cu e contract cu colega di partido, ex-minister di turismo y te cu algun dia atras, consehero den Gabinete Wever-Croes II, a firma cu e compania Mericano Lee Tofanelli & Associates Inc. tabata uno andando for di 2002 y cu na 2009 kier a continua cu ne pasobra a trece pa Aruba hopi na entrada di turismo. Pa loke ta trata e fecha cu a firma e contract, Ministerio Publico a indica cu a firma loke ya caba a acorda verbalmente, pues no tabatin cambio.
Tevreden: “E politiconan cu a mal usa, pasobra tin un investigacion penal andando riba Señor Briesen y awo kier baila riba su number, bo ta fout bezig y nos tin cu stop cu e cosnan aki y papia berdad.” E ta bisa esey a pasa tambe caminda parlamentario di oposicion ing. Mike de Meza (AVP) a relata con cosnan a pasa y pakico el a dicidi cu no ta bay sigui pleita e caso. “P’esey awe AVP tin dos hala: esun hoben cu ta bisa cu mester persigui Briesen y Mike de Meza cu ta bisa cu tur cos a cana corecto,” Tevreden a declara.
Na opinion di e politico na Aruba mester yega na e punto cu, como politico, si algo a cana robes, mester bisa cu el a cana robes y ora cu algo a cana manera e mester a cana, segun normanan, nos mester bisa esey tambe y no purba di haci politica djis pa susha number di hende serio cu a sirbi e comunidad na un manera recto.
Tevreden a argumenta ademas, cu e retraso den caba di atende esaki, fuera cu ta algo cu AVP no a haci ora cu e tabata por, ta tambe door cu dos abogado den e caso a fayece y esey ta trece cu ne un procedura adicional di traspaso pa otro abogado.
“Realidad ta tambe cu gobierno no ta un aparato eficiente, procedura di hopi simpel y esey tambe nos mester corigi. Esey ta cosnan cu mester mehora den nos pais. 2017 ora cu gobierno di AVP a trek in, eigenlijk nan mester a di biaha atende cu e caso aki, bay na mesa, yega na un schikking, paga e asunto aki pasobra tur cos ta mustra cu bo tin cu pag’e y cla. Anto e ora ey nos ta spaar Pais Aruba placa di rente, e ora ey nos ta goberna serio. Ban practica politica cu ta hiba nos pais dilanti,” Tevreden a bisa.
A probecha pa indica cu den caso cu tabata trata nan propio colega di partido MEP, nan a mustra cu robes ta robes y a atende cu nan. A bisa cu ta cosnan pa mehora y a tuma disciplina contra nan. No ta cuestion di kies pa un hende si of no; ta cuestion cu ora bo tin hecho, bo tin OM ta manda un carta, anto e ora ey bo no tin cu sigui haci politikeria.
