Helicopter nobo no ta bin mas

E ausencia di e helicopter den forma scondi y nos publicacion a pone Cuerpo Policial di Aruba reacciona. Ya caba Cuerpo Policial a confirma e ausencia di helicopter y a splica cu ta pa cambio di matricula.

E papia di tres dia di ausencia pero e chens ta grandi cu e lo dura mas cu tres dia. Legalmente e Helicopter mester registra su mes bou matricula di Aruba. Algo cu no a sosode desde su yegada. Awor cu e asuntonan fiscal tambe ta ser regla, a yega e momento pa e matricula tambe ser cambia pa registracion di Aruba.

Hopi cos a bay robes legalmente cu e helicopter. E minister a core haci cosnan pura cu yudansa di su amigo colega cu a hande e deal cu SADI. Pa colmo e helicopter a yega y minister mes a bisa publicamente cu esaki no ta e helicopter. A tuma nota cu e helicopter aki tabata lease for di SADI pa un planta di television Colombiano. Awor cu e Helicopter a bay pa cambia Matricula, segun autoridad no mester a laga un spare atras mientras cu e ta ausente algun dia. Algo cu a bay chek mas leu ta ki dia e helicopter official mes ta bin Aruba? Esey e minister a bisa publicamente na yegada di e Helicopter actual.

Despues di busca informacion a bin saca afo cu ningun helicopter nobo mas lo bay bin. Ta mesun Helicopter bieu actual ta esun cu lo sigui bula na Aruba. E biaha aki ademas di cambia matricula lo bay over tambe na kita e stickernan etc di Television y adapta esaki completo pa sigui bula pa Polis na Aruba. Pueblo ta pendiente pa mira ki dia e helicopter ta dal su prome score pasobra te cu awe bulando algun luna no a mira ningun exito di e helicopter. Al contrario e helicopter ta costa pa luna casi 200 mil florin cu ta sali for di caha di pueblo. Tin informacion cu rond di e pago di helicopter tin otro cosnan mas cu mester wordo investiga. Esaki ta costonan extra cu mester wordo confirma si ta pais Aruba mes ta pagando pa e extra costonan. Aki ta papia di casnan luhoso di dos piso cu a huur pa acomoda famia di esnan cu ta handle cu helicopter. Si ta pais Aruba ta paga pa e gastonan aki, nifica cu e costo real di e helicopter manera minister a bisa ta un farse. Mientrastanto lo keda pendiente pa e yegada atrobe di e helicopter cu matricula nobo y kizas sin sticker di logo di TV Colombiano.

Comments

comments