Diabierna den oranan di anochi, polisnan coriendo riba Green Corridor a mira un pickup cu velodidad masha halto mes. Na prome instante e pick up double cabina color preto, tabata core na manera iresponsabel. Polisnan a busca manera pa para e pickup, pero esaki a cuminsa core pa polis. El a subi Green Corridor riba direccion contrario. El a bay ariba, el a core pero na banda cu ta bay Playa. Un momento di peliger total, mirnado e autonan cu tabata tin di ariba, cu mester a baha caminda, hala, pa e pickup cu tabata core den verboden riba Green Corridor. Dado momento polisnan a coy su number y tabata core pareu cun’e direccion p’aiba, pero cu e pickup den verboden.
A pidi refuerso. Refuerso a bin y a logra para e auto, door di bloki’e na altura di e rotonde di Drive Inn. Nan a bay over na para e chauffeur y ora a bay controla, a resulta di ta nan mesun colega, hefe di polis, di fam W. E persona aki a keda deteni y no a coopera tampoco cu coleganan ora cu nan a pare. E tabata asina burachi cu e no kier a coopera pa suple. Mirando e situacion na warda di polis, hasta a drenta cun’e di patras pa evita cu hende ta mire. A bay over pa trek in su rijbewijs. E hefe di polis aki, kende ta handle entre otro rooster na Santa Cruz, a perde su rijbewijs, pendiente investigacion. Danki Dios e no a causa ningun desgracia. Un ciudadano cu tabata riba caminda y a mira tur loke ta pasando y cu tabata manera un pelicula na Merca, ora cu polis a sigui auto di hende, a logra graba esaki cu su telefon y e cos aki a manera bay rond tur caminda. E persecusion riba Green Corridor te na e rotonde di Drive Inn, te ora cu a blokia e auto. Esaki ta polis cu a core pa polis.
Tin cu remarca cu algun dia pasa el a haya reconocimento cu 35 aña di servicio den Cuerpo Policial. Pero lamentablemente tin entendi tambe cu e tin problema cu alcohol.
