Hazaña: auto a subi pista di aeropuerto via lama

9649

Awe den oranan di marduga Polisnan a topa cu un caso hopi misterioso na aeropuerto unda un intruso cu su auto a subi tereno di aeropuerto.

Ta trata aki di un Toyota Agya color blanco, maneha pa un persona masculino. E Polisnan cu a mira e hecho aki mesora a manda pidi refuerso policial pasobra no tabata sa kico tabata intencion di e persona y si e tabata su so of cu mas hende.

E diferente polisnan a yega cu hopi cautela pa nan mesun proteccion, pero a resulta cu tabata un homber so, kende tabata sinta den su auto cu tabata riba tereno di aeropuerto.

Tur cos ta mustra cu el a drenta na e parti pabou di aeropuerto, e banda di Nikki Beach bin zuid eynan. E Polisnan ta asombra pasobra no tin niun buraco, niun caminda cu e por a subi e tereno sino cu ta via di lama, o sea e mester a pasa den awa y djey subi tereno. Probablemente el a keda pega y no por a sigui.

Polisnan a haya nan mes ta drenta awa pa yega unda e auto a keda para y investiga si tabatin otro entrada cu e chauffeur por a uza.

A detene e homber y a transporte pa Warda unda e mester duna cuenta di a viola tereno di aeropuerto, un hecho cu ta trece peligro pa aeropuerto mes.