Haya sa un tiki mas riba POH durante programa di television diadomingo awo

Den cuadro di e 60 aña di existencia di Wit Gele Kruis, POH kier a haci un programa di television. Segun Jasmira Croes-Mora, coordinador POH, e programa lo ta un serie di cuater programa, cu ta splica un tiki mas di e trabao di un POH.

POH a cuminsa na 2012. Esaki tabata door cu a wak cu tabata tin un necesidad hopi halto cu e malesa di diabetes. Pashentnan hopi biaha tabata drenta hospital cu diabetes for di control.
Esaki ta un problema, pasobra un hende drenta hospital caba, algo no ta bon.

 

WGK y AZV ta splica ariba programa di POH

Posted by 24ora on Monday, May 13, 2019

Entre otro door di esey, a dicidi hunto cu AZV pa asina cuminsa cu e proyecto di POH (Praktijk Ondersteunend Huisartsenzorg. Na cada dokter di cas a pone un verpleegkundige cu ta specialisa pa trata cu e malesa cronico di diabetes. Na 2012 e tabata un proyecto piloto, cu a wordo alarga na 2014. Eynan tabata tin seis POH cu tabata trahando e tempo eynan y na 2016, a dicidi pa bay over na un implementacion di POH. Es decir cu el a bira algo vast y no tabata un proyecto mas. Asina a cuminsa busca hende nobo pa por cuminsa cu e funcion y tambe a cuminsa haya curso.

Te awor aki tin 32 POH. Tin 13 POH den opleiding y e intencion ta pa na final di dia tur dokter di cas por tin un POH y asina eynan por trata e pashentnan di diabetes y tambe ta tratando pashentnan cu tin problemanan cardiovascular. E programa aki di cuater parti, ta entrevista pashentnan cu ta conoci den comunidad, pa asina papia un tiki con nan a experencia e POH y tambe con el a bay cu nan. Tambe tin dokternan di cas cu ta entrevista cu tambe ta papia di e trabao di un POH.

Dimas lo entrevista tambe of a entrevista tambe algun di e POHnan cu lo conta mas of menos con e ta bay den un rutina diario cu e pashentnan. Tambe tabata hopi importante cu e ayudo di AZV. Tambe nan a wordo entrevista y e personanan aki a conta un parti di e trabo di POH. Pueblo henter ta wordo invita pa sintonisa Telearuba diadomingo awo pa 10’or di anochi pa mira e prome programa. Despues lo ripiti esaki diaranson.

E asistencia di POH

Tin hopi pashent di diabetes na Aruba y tambe e malesa aki, hopi biaha ta bin cu e problemanan cardiovascular. Por bisa cu nan ta bay man den man cu otro. Tin hopi hende obeso ta cana rond, hopi hende grandi. Awendia e hendenan ta biba toch un tiki mas largo, cu tur consecuencia cu por tin. Tin hopi pashent di diabetes y hopi pashent cu problemanan cardiovascular.

Te awor aki por bisa y ta pesey tambe e proyecto piloto a bira un implementacion pasobra dokternan di cas y AZV tambe a realisa, door cu a haci uzo di e programa promedico y a hinca tur cifra cu ta haya y analisando esey, a bin mira cu hopi di e pashentnan, sucu a cuminsa mehora. Esaki ta conta tambe pa esnan cu tin problemanan cardiovascular. Tin hopi pashent tambe a cuminsa na baha peso. Nan ta uzando nan remedi tambe pasobra nan sa pakico nan tin cu uza nan. Esaki tabata un problema, pasobra hopi biaha nan tabata uza nan remedi, pasobra nan no tabata tin e guia pa asina nan por sigui haci esaki.
E POH ta realmente tuma su tempo pa atende cu un pashent. Hopi biaha ta tuma entre 30, 45 minuut na cuminsamento, pa realmente cuminsa splica e pashent, pa fula tera tambe con hopi e pashent sa di su mesun malesa.
Na final di dia pa encurasha e pashent pa e mes tuma responsabilidad pa su malesa. Con cu bay bin, POH no ta bay cas cu e pashent na final di dia. E ora e POH mes ta siña nan pa tuma e miho decisionnan den parti di comemento, por ehempel.

Pa ken

E programa ta pa e publico en general. Esey ta e intension y ta p’esey tambe a haci’e hopi amplio unda cu a entrevista varios persona, entre otro e pashentnan, AZV, tambe e profesionalnan, esta e dokter di cas. E ta pa publico general. Y tambe pa nan sa ki importancia e trabao cu POH ta haciendo, tin pa nan mes.

AZV

AZV ta esun cu ta sponsor e programanan, Sin nan esaki no lo tabata posibel, Jasmira Croes-Mora a splica.

Joost v/d Kamp di AZV a comenta cu AZV ta financia e cuater programanan tocante POH. A haci’e door cu nan ta kere den e funcionamento di POH, door cu nan ta wak cu e ta traha bon. E ta pas bon loke ta e demanda di e pashentnan, clientenan di AZV tin mester di dje. Esey ta atencion.
E dokter di cas su tempo ta limita. E por splica algo un biaha, pero e tempo cu POH tin pa su pashentnan tin ta mey ora, cu ta hopi mas eficiente pa guia un pashent pa bay om cu su malesa, door di ta malesanan cu ta cronico. Sucu y presion halto ta malesanan cu ta keda cune pa resto di bida y tin cu wak con ta control’e. E atencion ta traha hopi bon. E resultadonan ta bon, manera cu e wordo midi. Lo ta bon pa full Aruba ta na altura con esaki ta bay. Si bo ta un pashent, puntra bo dokter pa bin na remarca pa bo wordo guia pa un POH. Esey ta e meta principal cu tin comprension di AZV pa e funcionamento di un praktijk di un dokter di cas.

Muchanan mas jong

V/d Kamp a splica toch ta wak cu hendenan ta tuma responsabilidad pa nan salud den nan mesun man. E hobennan ta conciente y ta buscando maneranan nobo. Bo ta wak cu tin mas demanda riba cumindanan vegetariano, muchanan hoben ta conciente di nan salud. Preventivo nan ta basta conciente.
AZV mes ta organisa e aña aki, ta bin cu un Aruba Healthfair, unda cu ta mustra kico tur ta posibel na Aruba pa movecion, deporte, con pa cushina saludabel y economico.
Ta wak kico ta biba den comunidad y ta purba di speel iin riba esey, segun v/d Kamp.
Si bo tin diabetes y presion halto caba, ta importante pa cuid’e y no bisa cu bo no ta tuma remedi pa un siman y e ta cura. Pa bay om cun’e, pa acepta realidad, e no ta facil. Pero cu POH, a mira cu e ta yuda, v/d Kamp a bisa por ultimo.