Un grupo substancial di habitantenan di Noord ta firmando un carta cu un peticion special dirigi na Minister Chris Romero, encarga entre otro cu maneho di transporte publico. Nan tin problema cu e otorgamento for di control di permisonan y licensianan pa busnan di placer, cu ta pasa stroba nan paz, trankilidad, nan soño y hasta nan privacidad! Ta creando un situacion caotico den transporte publico unda cantidad a bira mas importante cu calidad!
Ta trata aki specialmente habitantenan di casnan riba L.G. Smith Boulevard, Malmokweg, Westpunt, Turibana y e casnan nobo banda di Esmeralda, Safir, Opal, etc. Ta parce cu companianan di Tour Bus a enfoca riba e areanan ey, cu ta areanan residencial, pa keiro cu nan clientenan specialmente ora di karaoke.
E habitantenan ta keha cu for di atardi te marduga, busnan ta pasa den area residencial cu musica duro, pitamento y pasaheronan na gritamento (cantamento), colga burachi for di bentanan habri, chauffeur coriendo zigzag memey di caminda, strobando nan trankilidad. Den fin di siman busnan ta keiro den marduga, cu e mesun desordo aki, strobando hende grandi di drumi, muchanan, hende malo, etc. Ni cuanto cu a keha na e departamento concerni, nada ta sosodiendo. Ey a bisa e habitantenan pa check cu Minister, pasobra ta “nan” ta duna tanto permiso descabeya asina, sin reglanan defini unda e “Party Bus” nan aki por core cu nan pasaheronan, ki ora, etc.
E situacion sinembargo ta bira un poco mas serio ora cu habitantenan sinta den nan cas diripiente ta scucha e gritonan di cantamento pafo, musica duro y pitamento yegando cerca y den fondo ta scucha e animado riba e bus ta menciona cu “esaki ta cas di tal politico, tal bankero, tal comerciante prominente den comunidad, etc.
Aki ta e parti peligroso, den cual solamente ta stroba e trankilidad den bario, sino ta bira un menasa pa nan siguridad tambe. Den pasado tabatin caso serio di secuestro den e mesun bario aki, riba yiunan di comerciante. E animado hopi biaha no sa ken e tin den su bus, ni kico por ta nan intencion, pa core grita nomber di figuranan den comunidad y nan adres.
Precisamente den e area aki, Gobierno ta exigi doñonan di cas pa mantene nan inversion na un standard halto, ta cobra mas caro pa erfpacht y grondbelasting, pero no ta respeta privacidad y trankilidad di e bario. E Minister encarga cu Transporte Publico no tin un minimo idea di e molester cu e ta causando dor di no por caba di fiha un maneho serio riba e tereno aki.
Ta kere cu pa otro siman e carta oficial lo sali den direccion di e mandatario, cu un peticion special pa fiha un maneho estricto pa busnan di placer, orario cu nan por opera y specialmente respetando areanan residencial. E maneno awo parce ta enfoca solamente riba aspectonan tecnico di e bus, pero no riba contenido di e producto cu e compania ta ofrece, orario di operacion y mas.
