Habitantenan di De Vuyst ta keha Polis di abuso di poder

13076

Tabata alrededor di 9:00pm cu Polisnan a yega na cantidad, drenta cura di cas y detene dos famia. Ta hasta keha cu Polisnan a bay te paden di cas pa detene hende. Un yiu a relata na nos cu su mama a bay tira sushi den bari, den cura di cas, y cu Polis a pasa den auto y detene na mal moda, chok’e y hib’e. Yiunan cu a bay defende nan mama, tambe a bay. Na tur ta papia di 7 detencion entre dos cas band’i otro ma De Vuyst, na San Nicolas.

Polis a adverti for di ayera caba cu nan lo traha cu “man duro” y a conseha publico pa no ta riba caya despues di 9:00pm. Tambe a anuncia multa cu ta cuminsa na 1000 florin y cu por bay te cu 10.000 florin pa esunnan cu no cumpli. Mescos ta conta pa negoshi cu tambe por haya multa entre 1000 y 10.000 florin si nan no cera na ora.

Habitantenan di De Vuyst ta keha Polisnan di abuso di poder den TDQ

Posted by 24ora on Sunday, March 22, 2020

“Pero esaki no ta asina, esaki ta gewoon abuso. Nan a bay cu mi mama na mal manera sin cu e tabata riba caya”, asina e yiu homber a conta 24ora.com cu un bos preocupa, disgusta y desiluciona pa e forma di abuso di poder den cual Polisnan ta actuando. E yiunan ta puntra nan mes si ta pesey Polis no kier prensa riba caya pa relata e tipo di casonan asina, den cual obviamente pa famia, e forma di traha aki ta inaceptabel.

Mas trempan Fiscal mr. Jolanda Pronk a anuncia cu ciudadanonan por ta den nan veranda of den cura di cas, basta nan no ta pafo riba caminda publico. Ta parce cu e Fiscal ta papia un otro idioma cu e Polisnan cu ta aplicando e ley di “Toque de Queda” aki di un forma totalmente diferente!

Mester bisa si cu mas trempan a manda varios patruya pa e mesun bario, De Vust, pa tiramento di auto di Polis cu piedra. No ta conoci si e prome caso por tin e di dos caso como consecuencia.

Comments

comments