Ladronnan awendia no ta worry cu tin habitante den nan hogar. No tin trankilidad den bo mesun hogar mas. Parce bo mester bay biba den un cas tur na hekwerk manera un prison.
Durante oranan di anochi un señora grandi biba su so den cas na Bachstraat a yama Polis. Dos ladron a bula den su cura y pasa pariba di cas. Eynan a ranca bentana cu kozijn kibra y drenta camber pa horta.
E señora a tende un desordo y a bay mira kico ta pasando. El a topa cu e dos ladronnan bezig ta cobando den cashi etc. El a dal un grito y e ladronnan a sali na careda bulando bentana cu nan a kibra pa drenta. Tabata tin cosnan cla pa horta. Entre otro laptop. Polis a bin na e adres. Algun imagen di camera di seguridad tambe tin. Polis a papia cu e habitante cu tabata hopi spanta.
Algun amiga tambe a core yega. A busca un persona encarga cu seguridad pa presenta y keda te mainta. Asina mes prome cu e seguridad a yega, y despues cu Polis a bay, e dos ladronnan a bolbe na e adres. Nan a wordo graba dos biaha. Prome cu a yama Polis y despues cu Polis a bandona e sitio. Nan tabata den un auto cu tambe a ser graba cu camera di seguridad.
Tur cos lo ser entrega den man di autoridad. Algun persona a bin corta plywood y sera e bentana cu a ser ranca cu kozijn y tur cos. E señora a splica cu esaki no ta prome biaha cu ta drenta horta den su cas. E cas Bachstraat ta keda den e area conoci como Klip.
