Guillfred Besaril: E periodo di juni pa december 2020; Un proceso duro di aprendisahe

175

‘E pandamia cu bati na mundo su porta na 2020 a expone e debilidadnan di e naturalesa social – economico den cual nos ta biba aden. COVID no afecta solamente nos sistema di Salubridad Mundial. Na mes momento e la revela e debilidad den otro sectornan manera esun Financiero y di Educacion di diferente Pais. Un otro elemento cu a keda expone ta e naturalesa di hende’ Minister Plenipotenciario, sr. Guillfred Besaril, a declara na salida di e reunion di conseho di Minister di Aruba.

Minister Besaril a sigui declara cu durante e reunion di conseho di Minister di Pais Aruba cu e Secretario di Estado, sr. drs. Raymond Knops, cu a tuma lugar siman pasa, e la probecha na recapitula e proceso cu a tuma luga duranta e periodo di Juni pa December 2020. ‘Muy apesar di a yega na un acuerdo December ultimo, mi mester remarca cu e proceso pa yega na e acuerdo no tabata nada facil. E tabata un momento di aprendisahe tanto pa Aruba como Hulanda. COVID no a bini cu un manual y e consulta cu expertonan mester a sucede di forma integral. Di expertonan riba e tereno di maneho di pandemia y salud, te na esnan cu a studia historia cu por a duna un 

bista riba e tema di recuperacion economico despues di un periodo di Guera. Paso esaki ta e realidad di COVID; mundo ta enfrentando un enemigo cu e no por mira y ta simplemente cana kibra sin invitacion alguno’ Minister Besaril a elabora.    

Despues di e bishita di sr. Knops a sigui un reunion entre e team di maneho di Arubahuis y Prome Minister, sra. mr. Evelin Wever – Croes. Ademas un reunion di evaluacion di Conseho di Minister. E mandatario a duna di conoce cu durante e evaluacion menciona a toca diferente tema di forma amplio. Un di nan tabata e dinamica nobo cu entidad di COHO ta bai trece cune y e impacto pa Aruba y Arubahuis. Minister Besaril a reitera di forma enfatico cu Arubahuis mester keda “On Top Things” di awor pa dilanti. ‘Mi ta sigur cu e periodo di Juni pa December ultimo, pa tanto sra. Prome Minister, mi colega sra. mr. Xiomara Maduro cu su equipo y mi persona hunto cu staf y personal di Arubahuis, lo keda graba den nos memoria como uno den cual nos a siña kiko e ta pa negocia den tempo di crisis pandemico. Nos a bati cabez hunto. Nos a discuti, para fuerte na cierto momento pa lo cual nos ta kere aden, perde soño na cantidad, ma schouder cu schouder nos cana yega na un resultado satisfactorio pa Pueblo di Aruba. Durante e proceso aki nos a establece un bon relacion cu Hulanda cu lo mester duna su fruto den futuro cercano. Toch si hende puntrami si mi ta contento cu e acuerdo, mi respuesta semper lo keda un “NO!” pa motibo cu lo mi a desea pa nos a yega na esaki bou otro circunstancia. Pero cada uno di nos por ta di acuerdo cu na momento di a firma e acuerdo, nos a garantisa Aruba como Pais un oportunidad na recupara di e situacion actual. No ta pornada nos ta considera 2021 e Aña di Recuperacion’ segun Minister Besaril.

E mandatario a termina su entrevista gradiciendo tur e coleganan mandatartio na Aruba y nan equiponan pa e sosten, dedicacion y pasenshi ricibi durante e proceso di Juni / December 2020. 

E no tabata trabou di solamente dos of 3 minister so, pero di un Gobierno cu awe tin e experiencia necesario pa sigui enfrenta e pandemia di COVID na bienestar di un mihor mañan pa Pueblo di Aruba.