Guera sindical pa representa trahadonan di Aeropuerto

Ta parce cu cada dia mas y mas e imperio di Sindicato di Trahadonan di Aruba, STA, ta confrontando hopi reto y desafio. Durante e ultimo añanan e sindicato a crece enormemente, pero no su staff pa brinda servicio y sosten na su miembronan. Na varios compania y departamento nan a gana representacion pero finalmente no a logra drenta pasobra no ta cumpli. Pero e miembro mas grandi y importante di STA, esta Aruba Aiport Authority NV awor ta bou menasa pisa di e sindicato FTA.

Awe Mediado di Gobierno a publica un anuncio di referendum den medionan di comunicacion specificamente pa representa e trahadonan di Aruba Airport Authority N.V. E procecura legal aki ta tuma luga diamars dia 27 di augustus 2019 entre 11:30am pa 3:30pm den e “Main Conference Room” na Aeropuerto mes.

Di acuerdo cu e anuncio oficial, te awor aki lo participa unicamente Sindicato Federacion di Trahadonan di Aruba (FTA) na e referendum aki. Di acuerdo cu ley, den caso cu FTA haya mayoria di e trahadonan su tras, automaticamente Diego de Cuba y STA ta perde e derecho di representa e trahadonan di dicho compania.

Mester bisa sinembargo cu sindicato STA ta representando e trahadonan di Aeropuerto pa hopi aña caba. Es mas, Diego de Cuba mes ta traha eynan. E hecho cu dado momento el a tuma un encargo cu Minister Glenbert Croes no a cay den bon tera cerca e trahadonan, di otro companianan miembro tambe, pasobra a sinti den cierto sentido cu e sindicalista a “fix” su mes y a laga e lucha sindical na caya.

Historia ta conta nos cu, siendo un departamento di Gobierno, antes sindicato SEPPA tabata representa trahadonan di Aeropuerto. Na aña 2003 oficialmente STA a cuminsa representa e trahadonan. E no tabatin’e facil pasobra na aña 2011 a lanta un sindicato FLOA, bou trahadonan di Aeropuerto mes, pa purba haya representacion di e trahadonan di Aeropuerto. E referendum a tuma luga na october 2011 pero STA mes a gana y a retene su representacion. Awor, despues di 8 aña, ata un otro sindicato, e biaha aki FTA, ta bolbe haci un intento pa benta e imperio di STA abou den Aeropuerto.

Na tur Aruba Airport Authority N.V. ta conta cu mas o menos 230 empleado en total. Di tur, kitando gerencia y esunnan cu no tin derecho di voto, lo conta cu mas o menos 173 empleado cu lo dicidi cua sindicato lo sigui representa nan. Pues si logra 87 voto of mas, mesora STA ta perde su mandato y FTA lo por sigui negocia y representa e trahadonan dilanti gerencia di e compania.

Na fin di augustus lo bira conoci ken lo gana e guera pa representa e trahadonan di Aeropuerto di Aruba, sea ta Diego de Cuba di STA of Hubert Dirks di FTA.