Guardian Group Fatum a tuma tur medida necesario pa cu “normal” nobo

754

Prevencion ta cana paralel cu e medida, protocol y concientisacion pa cumpli cu reglanan di seguridad den nos bida “normal” nobo. Despues di simanan di inseguridad pa reduci riesgo cu e virus di Corona lo a sigui plama, awor ta tempo pa cuminsa wak futuro na un manera diferente y sigui respeta reglanan di salubridad publico.

Como Guardian Group e seguridad di nos clientenan y nos personal ta na prome luga y pa e motibo aki a tuma tur medida di seguridad mas liher posibel. A tuma na cuenta pa loke ta espacio di 2 meter entre areanan caminda mester traha, postersnan cu informacion, limpiesa profundo y frecuente, uso di sanitizers, stickernan ariba vloer, midi temperatura na entrada y proteccion adicional di nos personal pa medio di pexiglas ora ta atende nos clientenan personalmente.

Tur cliente cu bishita nos oficina y no tin un “mouth mask” lo por haya esaki di nos pa extra proteccion, maske no ta obligatorio na Aruba den e protocol di Covid-19. Recientemente e TASKFORCE di Covid19 na Aruba a hasi un bishita na nos oficina di Guardian Group pa controla y confirma cu nos ta cumpli cu e exigencianan (compliant) pa asina por sigui brinda e servicio na nos clientenan. E TASKFORCE ta consisti di un team forma door di Dienst Openbare Werken (DOW), Cuerpo di Bombero y Rescate Nacional (Brandweer) y Dienst Volksgezondheid (DVG). Ariba potret di robes pa drechi: Sr. Aldrin Buckley (Facilities Manager na Guardian Group), Representante di Cuerpo di Bombero y Rescate Nacional (Brandweer), Sra. Madel Jacopucci (Marketing na Guardian Group), Representante di Dienst Openbare Werken (DOW) y Representante di Dienst Volksgezondheid (DVG).