Guanipa: Mi kier bay bek Venezuela pa haya e tratamento necesario

Veronica Guanipa a bin Aruba na januari pa disfruta di carnaval y pasa un luna cerca su famia, pero desde cu a presenta e pandemia di Coronavirus e no por a regresa su pais bek. Aki el a bin haya sa cu e tin cancer y e kier bay bek su pais pa haya e tratamentonan necesario. Door di e situacion cu no tin vuelo pa Venezuela, e no por regresa.

Na momento cu el a cuminsa sinti su mes malo, el a cuminsa busca yudansa na Rode Kruis, hospital cu e pensamento di e forma ey lo ta mas lihe. Eynan a bis’e cu no por dun’e asistencia ya cu tabata brinda esey na e personanan cu tin Covid-19. Via un fundacion el a bin haya yudansa cerca dokter Ho-kan-you, kende a mand’e haci biopsy. Despues di a ricibi e resultado, a bin mira cu e tin cancer.

AZV ta nenga ayudo na pashent di cancer. Click pa mas informacion: https://24ora.news/2DWwmJU

Posted by 24ora on Friday, August 14, 2020

Desde e momento ey, el a cuminsa cana su caminda pa pidi yudansa na gobierno, autoridadnan di aki. El a busca diferente manera pa comunica cu e gobernador di su estado, pero te cu awo no a haya un contesta. El a hasta puntra pa un vuelo humanitario y ta paga p’e. Nan a bis’e pa vuelo humanitario, e mester busca 5 hende malo y pa paga esaki completamente.

E kier bay bek Venezuela pa haya e tratamento necesario of si por mand’e Colombia. E sa cu aki na Aruba no ta provee e tratamento necesario y p’esey ta pidi pa yudansa. El a ricibi yudansa di hendenan pa cierto remedi cu e mester. Den noticia di Venezuela el a tende di un vuelo cu lo sali cu ilegalnan for di Aruba, e ta pidi e mandatario pa tene na cuenta y si por pone riba e vuelo ey pa bay busca e tratamento necesario.