Aruba Hotel & Tourism Association (AHATA) a celebra e logro di 113 supervisor y manager cu a completa un tayer ofreci den colaboracion cu CHTA Education Foundation (CHTAEF).
Supervisor na restaurant, hotel, timeshare, bottling company, vacation rental, y varios compania chikito di servicio, a tuma dos dia di les interactivo y practico cu AHATA a organisa den colaboracion cu CHTAEF. Na e ceremonia di certificacion na La Cabana Beach Resort a honra e exito di e participantenan den e tayer “Own Your Supervisory Authority Responsibly”cual ta empodera e hefenan pa haci nan trabao di liderazgo na un manera responsabel.
E ceremonia di certificacion a habri cu palabranan di Tisa LaSorte, Presidente & CEO di AHATA, kende a expresa cu e ta impresiona y orguyoso di e dedicacion di e participantenan y a gradici nan pa nan rol importante den nos economia. James Hepple, Tesorero y Administrado di CHTAEF tambe a comparti palabra di motivacion y elogio. Sra. LaSorte hunto cu instructornan di e tayernan Louise John y Suzanne Shillingford-Brooks a entrega e participantenan cu nan certificacion den un atmosfera masha ameno. E anochi a conclui cu un recepcion alegre pa participantenan y demas invitado por sigui celebra y conecta cu otro. Durante e evento por a observa cu e supervisornan di diferente compania a gosa di conoce otro y siña di otro.
E exito di e tayernan ta representa un otro logro importante pa AHATA, reflehando nan vision y esfuerso pa promove un turismo responsabel cu ta enfatisa calidad. Pa logra un calidad halto Aruba mester ofrece servicio superior. E asociacion ta comprometi pa inverti den e desaroyo di nos forsa laboral den e sector di hospitalidad.
AHATA ta gradici Eagle Aruba Resort y La Cabana Beach Resort pa nan valioso aporte, cu a permiti e tayernan aki bira realidad y ta aprecia e aliansa valioso cu CHTAEF.
