Ramona Campos Garcia, hunto cu Grupo Folklorico Cultural Dominicano Aruba, ta celebrando 8 aña deleitando un y tur cu e bailenan tipico di Republica Dominicana. Y den cuadro di esaki ta bay tin un actividad cultural pa celebra e hecho aki den Sala Unoca di Cas di Cultura dia 12 di october, “Dia de la Raza”, caminda cu ta conmemora e dia aki pasobra ta un dia internacional rond mundo.
E ta un evento multicultural, unda cu tin diferente presentacion di artista, gruponan di baile di Aruba, di Peru, Portugal, Venezuela, e grupo mes ta bay haci su show tambe y tambe ta bay tin gruponan di teatro. Ta un integracion multicultural pa expresa y demostra cultura na Aruba.
Durante e evento ta bay tin varios invitado entre otro gruponan di baile Rosea Cultural Aruba, Teatro Experimental Contemporaneo Aruba di Jhon Freddy Montoya y Takiri Peru Aruba. Artistanan invita ta bay ta Farah Visson, Omar tu Poeta, Jhafreisi Hernandez, Victor Samuel El Duke, Jovita Andrade Portugal, Lisandro Tambora y Yorimbi el Enamorado.
Ta bay tin hopi sorpresa riba e dia aki cu ta bay causa un bon impacto durante di e evento aki.
Entrada ta obtenibel na Fundacion Dominicana Arubaanse Juan Pablo Duarte y tambe na The Classic Barbershop di Junior Tijeras, na balor di 15 florin.
Bin uno bini tur, bin celebra hunto cu Grupo Folklor Dominicano y Ramona riba dia 12 di october awo, di 8’or pa 11’or di anochi.
