Grupo End Child Abuse ta via un “drive by”

Grupo End Child Abuse ta organisa nan di dos protesta #TABASTA contra pedofiel diabierna awo dia 4 di september. E prome protesta tabata dia 3 di juli y despues di 6 siman ainda nan no a haya un contesta. E di dos protesta aki lo ta uno diferente, pasobra esaki ta un drive by dilanti Parlamento y Bestuurskantoor.

Esaki lo sali for di Linear Park pa 5:00pm y ta bay direccion Parlamento. A opta pa haci e drive by pa mantene na e reglanan di distancia social. E grupo kier haya un contesta riba preguntanan cu nan a haci. Pa mas di 20 aña nan ta lucha pa cambia e ley di pedofiel, pasobra esnan cu ta abusa di mucha no ta haya hopi castigo.

#TABASTA ta organisa protesta diabierna awo

Posted by 24ora on Thursday, September 3, 2020

Segun e grupo, a nenga nan permiso pa por organisa otro marchanan di protesta, pero nan no ta rindi. E idea di e drive by aki ta pa pasa dilanti Parlamento y Bestuurskantoor riba un velocidad pocopoco, pita pa tanto minister- y parlamentarionan tende esaki. Nan ta invita henter comunidad di Aruba pa participa na e marcha aki y pa ta e bos di muchanan cu no por defende nan mes. Ta recorda tur hende cu lo blokia un banda di caminda y e otro banda ta pa esnan cu kier keda core rond.