Departamento di Mucha y Hoben (DMH) a sigui cu otro accion concreto relaciona cu e trabounan riba e area educativo y informativo di Codigo di Proteccion. For di 6 di november a inicia e di dos tanda di training tocante e rol di Supervisor di Codigo. Tabata trata di 6 mita dia di training y tur a tuma luga na e edificio moderno y innovativo, Futura.
Na luna di april ultimo Aruba a logra certifica alrededor di 38 profesional caba, di cual 31 ta activo. Actualmente ta trahando riba e maneho diario di nan rol como Supervisor di Codigo pa ehecuta, monitoria y guia den diferente organisacion, cu traha directo y/of no directo cu mucha y hoben. E training aki ta ofreci na diferente profesional den 4 sectornan: social, salubridad, husticia y enseñansa.
Departamento di Mucha y Hoben (DMH) tin como vision; “Cu e mucha- y hobennan, naci y cria na Aruba, ta crece den un ambiente trankilo y pacifico, yena di amor y siguridad, unda nan derechonan, siguridad, proteccion y igualdad di oportunidad di desaroyo como mucha y hoben ta garantisa”.
Un di e metanan di DMH ta pa empodera nos profesionalnan cu conocemento y habilidad concreto y diferente, pa asina e decreto nacional Codigo di Proteccion por keda enfoca riba e aspecto preventivo, pa tin mas siguridad y proteccion pa nos mucha- y hobennan.
E rol di Supervisor di Codigo ta encera cu e profesionalnan aki den nan organisacion, lo bira e persona asigna pa ta e experto riba e tereno di (sospecho di) abuso di mucha. E coleganan profesional den e organisacion, por acerca den confiansa, pa asina por haya sosten y/of ayudo den forma di conseho y/of guia. Di e forma aki cada profesional por sigui atende cu un caso of situacion di posibel (sospecho di) abuso di mucha.
DMH di e forma aki ta sigui stimula y promove un trahamento hunto, caminda mas profesional tin un aporte concreto pa yuda sostene nos mucha-, mayor- y profesionalnan, pa finalmente por yega na un convivencia mas harmonioso, trankil y primordialmente sigur pa nos mucha- y hobennan.
