Cobamento di santo y piedra ta un necesidad primordial pa nos comunidad

Minister Otmar Oduber strobando nan: Companianan di Excavation keto bay sin trabou

Minister Otmar Oduber strobando nan: Companianan di Excavation keto bay sin trabou

Posted by 24ora on Friday, March 15, 2019

Dialuna mainta, dia 11 di Maart ultimo, un grupo grandi di doño y empleadonan di Heavy Equipment, grandi y chikito, minanan, henter nan manpower, a bin hunto, unda cu nan a para firme y a demostra nan malcontento y preocupacion contra un maneho inhusto di Gobierno di Aruba, particularmente esun di minister Otmar Oduber.

A aprecia cu Ministernan Andin Bikker y Otmar Oduber a ricibi nan manifiesto di dialuna mainta 11 di Maart 2019, aunke tabata bao di presion. E grupo di Heavy Equipment y Minanan a demostra nan curashi y lucha pa pueblo, e compania, e trahadornan y nan famia.

Durante e reunion cu a logra haya dialuna mainta, despues di a entrega e manifiesto, a ripara cu Minister Otmar Oduber tin hopi conocemento di ROP, na unda e Minister a duna algun consehonan cu por sigui.

E ROP ta yen di asuntonan cu no ta cla ni pa e companianan local ni pa e pueblo tampoco!! Un gobierno mester ta transparente y  pueblo tin e derecho di haya tur informacion CORECTO di e ROP. Pueblo merece di tin mas claridad riba e ley di ROP.

Durante Townhall-meeting di Camara di Comercio tocante ROP diamars 12 di Maart 2019 opinion y criticanan di diferente comerciante y tambe persona cu terenonan propiedad (“eigendomsterrein”) cu ta den groengebied, a bin dilanti demostrando nan preocupacion pa e ley nobo aki cu Gobierno kier implementa entrante 1 di Mei 2019. Dicon tin tanto pura asina pa e ley pasa??

Mester duna oportunidad pa por tin claridad riba e ley nobo aki. Un ley di un embergadura asina grandi no por wordo “bulldozed” den Parlamento. Ta pesey cu e introduccion di e ley aki mester wordo posponí te ora cu e pueblo haya e claridad necesario y cu a tene suficiente cuenta cu preocupacion y interes di pueblo.

Poniendo un paro total, unilateralmente y sin consulta cu esnan involvi, na e minanan (excluyendo Gavilan y Sero Thijshi) lo tin consecuencianan socio-economico y financiero pa nos pueblo.

Importacion di material ta trece cun’e cu prijs lo bira extremadamente halto. Un cas ta pertenece na prome necesidad, pa un famia tin un dak riba nan cabes. Un famia cu salario minimo no lo por yega na nan mes vivienda a base di e prijsnan halto a consecuencia di importacion di santo y piedra.

Gobierno a caba di otorga tereno pa construi cas! Cu e acto aki por bisa cu di un banda ta duna y na mes momento ta kita bek pa motibo cu no por cumpli cu exigencianan pa construi un cas pasobra e prijs pa construi un cas lo bira absurdamente caro !!

Alabes huurprijs di casnan social (FCCA) automaticamente lo subi.

Proyectonan di infrastructura lo tuma mas tempo pa motibo cu no por haya material pasobra lo mester warda pa esaki yega. Esaki tur lo costa gobierno mas.

Minister Otmar Oduber a garantisa  e representantenan dialuna mainta 11 di Maart 2019 cu tur 3 exigencia den e manifiesto ta wordo atendi:

  1. Duna e companianan envolvi e un periodo di transicion manera Minister Oduber a menciona den su rueda di prensa dia 22 Februari 2019 por inmediato.
  2. Cuminsa un dialogo social den tur aspectonan economico y social financiero pa evalua e consecuencianan.
  3. Lanta un comision na unda representantenan di companianan envolvi ta wordo invita pa participa pa busca y yega na un solucion faborabel pa tur 2 partido.

No mas tarda cu diaranson otro siman dia 20 di Maart 2019 un Decreto Ministerial lo wordo publica pa lanta un comision na unda representantenan di e grupo aki ta haya participacion.

E grupo ta completamente pro cuida nos flora y fauna y medio ambiente, pero di e otro banda ta kere tambe cu cobamento di santo y piedra ta un necesidad primordial pa nos comunidad.


Comments

comments