Grupo di comerciante a uni pa saca un man pa grandinan di Aruba

Un grupo di comerciante local mirando e situacion cu Aruba ta pasando aden pa prome biaha den hopi tempo, a dicidi di uni y yuda instancianan cu mester di e ayudo. 

A haya diferente comentario cu den e temporada aki ta mira kende ta esnan cu ta biba cu e pueblo, debi na e momento di crisis cu e pais ta pasando aden, e prome biaha desde inicio di siglo pasa, ora cu e poblacion chikito di e tempo ey a confronta cu griep Spaño. 

Awe mas cu un siglo despues, den un era completamente diferente, Aruba (y mundo) un biaha ta hay’e confronta cu un situacion critico, unda paisnan ta den crisis. E ta un situacion hopi dificil, pasobra ta trata di malesa pa cual mester tuma tur e medidanan necesario pa evita cu e personanan ta contagia. 

E comerciantenan cu a yuda na e causa ta entre otro: Lee Feng Supermarket,Ting Wei Supermarket, Grand East Hardware Center, Blue Sky Store, Gen Food Trading, Wayaca Supercenter, New Ten Sing Supermarket, Mega Stone Supermarket, Golden Dragon Restaurant, Feng Da Supermarket, Tai Hung Yun Restaurant, Lingnam Bar & Restaurant, Happy Life Laundry, Hao Ling Supermarket, Golden Wok Restaurant, Ur Delite Café, Mr.Kang Choi Lee, Mrs.lvonne Lee, Mr.Gui Cai Xie/Mrs. Wenying Xie, 520 Home Sweet Home Decor & More y tin hopi mas hende cu a yuda cu a prefera keda anonimo.

E grupo di comerciante local a expresa di ta preocupa pa esnan cu no tin acceso rapido na producto di higiena, net momento cu mas necesidad tin di esaki. Nan preocupacion ta pa e grandinan pero tambe esnan chikito.  Asina nan a bini hunto, cera cabes, y mira con nan por aporta cu algo na e diferente instancianan aki. A logra rapidamente recoge Hand & Surface sanitizer ( di Arupro); Total antibacterial Mikro Guard (di Total Cleaning), alcohol 70%, productonan sanitario y tambe comestibles. “E no ta hopi, pero locual ta dunando ta bin di nos curason y cariño, nan vocero a expresa. “Nos sa cu e situacion actual no ta facil, ban keda uni y calma pa asina nos por sali for di e situacion aki. Hunto nos por logra.”

E acto aki sigur ta uno bunita cu mas comerciante por sigui, principalmente pa instancianan manera Casa Cuna y casnan di cuido di grandinan, cu ta fundacionnan cu nan recursonan ta hopi limita.