Pa bo mantene un grupo 50 aña no ta facil. Tur caracter ta duna pa por anda cu otro. Awo con e grupo a nace.
E famia ta hopi musical y na fin di aña semper nan ta bin hunto, sea cu guitara, cuarta. Defunto Betico Croes tabata toca e acordion. Cu un piano bo no por bay di cas pa cas, pero cu un acordion si.
Asina ey nan ta bin hunto y pasa na diferente cas di famia pa nan toca e musica.
Antes nan no tabata graba. Nan ta toca canticanan cu tabata bin cu influencianan di afo. Ora cu a cuminsa graba tabata na aña 1990. E tempo ey Gus Oduber tabata forma parti di e grupo caba. Prome cancion tabata Paranda Arubiano, cual a dal hopi duro e tempo ey y ainda por bisa cu e cancion aki ta esun di mas grandi di Grupo di Betico.
Naturalmente tabata tin mas hit cu a bin despues, cualnan tambe tabata hitnan grandi. Pero Paranda Arubiano ta esun di mas grandi te ainda.
Asina e grupo, te cu awe, e grupo ta hunto cu famia.
Awendia a incorpora dos of tres persona cu no ta famia, pasobra bo kier mantene e grupo y den famia hopi biaha no ta tur ora bo ta haya e interes y instrumento necesario pa toca.
Bo no por pone seis cuarta por ehempel. Tin otronan cu a bin yuda e grupo tambe.
Pa por menciona, algun aña pasa a lanta un fundacion cu lo haci cu e grupo aki tin cu keda na bida, despues cu esunnan di actual mes bay. E grupo lo sigui existi despues di nan tambe.
Awor aki nan lo bay tin un concierto hopi grandi dia 12 di December cu diferente artista local cu lo ta compañando Grupo di Betico.
E grupo kier celebr’e cu henter Aruba. Ta trata aki di un grupo cu a brinda Aruba 50 aña largo cu su musica. Awor aki kier comparti esaki tambe cu e diferente artistanan cu lo bay graba cun’e.
Ta bay tin por ehempel Rocco Franken, Jeanedy Semeleer, Edjean Semeleer, Jeon, Landa Henriquez y asina tin mas artista cu lo bay compaña e grupo den e concierto aki.
Tambe ta biniendo for di Hulanda Izalinne Calister. Enfin e lo bay ta algo grandi.
Hopi biaha e musica cu nan ta produci no ta bende asina facil. Ora cu tin colaboracion cu otro artistanan, pueblo ta acept’e mas. Asina ey e idea ta pa celebr’e e aña aki.
Ticketnan lo ta disponibel na diferente Stacionnan di gasolin di Citgo na Aruba, tambe na iStore. Despues den un fecha mas despues lo anuncia unda mas lo bende e ticketnan.
E concierto lo bay ta na Renaissance Conference Center. Oduber no kier a divulga tanto cos, mirando cu lo bay tin hopi sorpresa pa e anochi aki.
Ta invita tur hende, cumpra e ticketnan na tempo pasobra e lo ta un anochi hopi grandi y lo ta un honor pa Aruba forma parti di e anochi grandioso aki.
