Grupo di Accion Anti-Racismo Aruba a cuminsa tuma accion contra descriminacion

Racismo y discriminacion ainda ta un topico cu mayoria hende no kier papia over di dje. Sinembargo den cenonan mas priva, personanan ta comparti nan experiencianan personal. Mayoria bes e persona cu a bira victima di discriminacion y racismo no por bay reclama esaki ningun caminda of nan ta scoge pa keda keto pa preveni pa e situacion bira peor. 

Mayoria pais tin differente instancianan cu ta duna informacion, conseho y guiya na personanan cu a experiencia discriminacion y racismo. Sea na trabou, en publico of riba e rednan social. Pa e motibo ey, algun cuidanonan a dicidi di bini hunto y a lanta e Grupo di Accion Anti-Racismo Aruba (GAARA). E prome   deliberacionnan a resulta den algun puntonan di accion pa cu e luna di november 2019 te cu december 2020. 

GAARA tin e intencion pa duna presentacionnan na instancianan y organisacionnan gubernantal y den sector priva. Ademas lo vigila si Gobierno ta  cumpli cu su promesa pa trece un Ombudsman na Aruba, cual ta in organo independiente cu ta controla Gobierno. Aruba ta e unico pais den Reino te ainda cu no tin esey ainda. 

Tur miembro di Grupo di Accion Anti – Racismo Aruba ta traha riba un base voluntario. Vocero di e grupo aki ta señora Mireille Sint Jago: “Nos grupo a wordo lanta den luna di november 2019. E luna cu e discussionnan tocante racismo semper ta bayendo halto, pavia di e celebracionnan di Sinterklaas cu e caricatura racista di Zwarte Piet. Un di e katalysatornan, ta cu tur aña e Minister cu tin e cartera di Cultura of Turismo, ta ricibi y saca potret cu e figura racista Zwarte Piet.

E aña aki e Minister di Cultura a hasta tene un watch party riba su pagina di FB, aunque e ta representante di henter pueblo. Un accion cu lo por haci daño na e brand Aruba, One Happy Island, como cu rond mundo caricaturanan racista di BlackFace, no ta wordo acepta.“  GAARA ta desea di sinta cu Departamento di Cultura pa busca un solucion pa e asunto aki. 
Pa mas informacion of pregunta por manda e-mail pa: [email protected]