Grito a pone bisiña bati alarma pa homber maltratando mucha muhe den cas

Dialuna algo pasa di 8:00pm, bisiñanan a yama Polis y avisa cu tin un homber ta maltratando un dama den cas. A scucha gritonan ora cu e homber tabata maltratando e ser femenino. Polis a yega mesora na Emmastraat # 46. Cacho brabo den cura a stroba e defensornan di ley di por a drenta bay paden facilmente.

Na un prome instante ningun hende kier a habri porta. A evalua pa kibra e porta si ta necesario. Pero prome cu Polis a kibra e porta, un conoci di Polis, esta Mark Mejia, a habri e porta. Un mucha muhe cu tabata den e cas a sali na yoramento.

Cu awa na wowo el a conta kico tabata pasando cune. E gritonan tabata cada biaha cu e homber tabata dal’e. Polis a bay cune Warda di Polis y eynan lo busca yudansa pe. A keda di avisa su famia tambe di loke ta pasando cu nan yiu muhe. E Polisnan a salba bida di e hoben aki danki na esunnan cu a scucha grito y avisa Polis mesora. Tres unidad di Polis a presenta pa asina atende cu e situacion.