Graduadonan 2020 turismo ta e lidernan cu lo crea e turismo nobo di Aruba

Graduadonan e aña’ki cu mester bay traha den sector di hospitalidad y turismo mas cu cualkier otro ta na un crusada importante. No solamente di nan bida pero di nan futuro profesional. Nan ta e prome graduadonan di e sector aki pa drenta na momento cu turismo, e unico pilar economico di e pais, ta conoce  un normal nobo. Esaki ta e pensamento di Andres  Geerman, Decano di Asuntonan Administrativo di Sector Hospitalidad y Turismo di e instituto Educacional Profesional Intermedio (EPI).

No mester lubida cu durante 40 aña e scol aki, cu antes tabata conoci como Bushiri Vakschool. A hiba un maneho basa riba e modelo cu a produci exito pa Aruba su principal pilar economico. Pero despues, segun ningun planeamento y consulta, di repente tur cos a cambia riba un 13 di maart, 2020. Frontera di Aruba a cera den pura, sin avion yegando y sin ningun turista. Un school cu pa 40 aña tabata prepara e hobennan cu mester drenta e sector aki, a tuma e situacion como un reto riba con ta bay traha den futuro.

Graduadonan 2020 ta e lidernan cu lo crea e turismo nobo di Aruba

Graduadonan 2020 ta e lidernan cu lo crea e turismo nobo di Aruba

Posted by 24ora on Friday, July 10, 2020

Pa finalisa e aña mes, segun Geerman, tabata un reto. Di lesnan personal y hunto, a bay pa lesnan online. “Awe nos tin bisa cu nos a logra meta. Un total di 63 hoben a gradua di cua 34 ta di e Management Program. Algo unico ta cu 27 di e grupo aki ta hende muhe.”

Apesar di e situacion di COVID-19, unda cu a cambia e sistema di duna les, Geerman ta sigura e educacion a brinda no ta di menos balor di loke a custumbra cu ne e ultimo 40 añanan. “E programa aki a keda cu e mesun balor,” e Decano a sigura. E grupo aki a finalisa nan estudio despues di 3 aña y tin un parti cu lo sigui pa un aña mas.

E grupo di studiantenan cu ta cuminsa e aña escolar nobo na augustus, a bay haya les di un otro forma y contrario na loke tabata e pensamento, e sistema nobo no a kita e interes di e programa eduativo aki cerca hobennan. E cantidad di inscripcion a keda similar cu loke nan a conoce den pasado. Tin studiantenan di MAVO, HAVO y EPB cu a mustra interes.

E cambio den e forma di duna lesa tambe ta trece su retonan. Semper lo tin hobennan cu por cay afo, si e dunamento di les ta den forma digital. Asina por ehempel e experencianan cu nan tabatin den e ultimo lunanan, cu a perde basta hoben di e sector di cushina, kendenan tabata den nan prome aña. Nan no tabata por a sigui, ya cu “mester a traha pa come, of yuda famia, y nan no tabatin internet.” EPI mes a parti 50 computer, sinembargo no por duna nan placa y cuminda.  Nan tin studiantenan consciente di e situacion na Aruba, cu a pone nan mes como boluntario pa cushina tur dia pa esnan den necesidad. .

Su mensahe na e graduadonan ta: “Futuro ta mustra uno yen di reto, negoshi turistico lo bay cambia, pero e graduadonan nobo aki cu ta drenta e sector laboral den e industria aki, nan lo bay drenta un sistema nobo, nan lo ta e lidernan cu lo haci e cambionan..”

DI e 63 graduadonan, algun lo sigui cu nan estudio den exterior y 4 di nan lo haya un ayudo financiero chikito (beca) for di AHATA.