Graduacion Kathleen Faro pa Bachelor of Arts na Universidad di Aruba

Dialuna 28 di October studiante di OGM, Kathleen Faro, a defende su tesis exitosamente den presencia di su amigonan y comision di graduacion di e programma OGM den Aula di Universidad di Aruba. 

Kathleen su investigacion su enfoke tabata riba e tema di factornan relaciona cu absentismo den e sector publico. Kathleen a splica cu aspectonan manera condicion di trabao, e actitud pa cu e trabao y e condicion familiar tin influencia riba e probabilidad cu un empleado ta ausente di trabao. E pregunta general di investigacion tabata: “Den ki extenso e factornan di mal condicion di trabao, actitud na trabao y condicion familiar tin influencia riba e nivel di absentismo den un organisacion?”. E resultado di e investigacion a demostra cu aspectonan riba e tereno di actitud, manera motivacion, y satisfaccion na trabao tin un influencia directo riba e existencia di absentismo.

Pa su investigacion, Kathleen a acerca Cuerpo di Aduana Aruba. Por medio di un encuesta Kathleen a logra colecta e datonan necesario pa contesta su pregunta principal. Algun aspecto relevante di e investigacion a mustra na punto number uno cu motivacion, especialmente e transparencia den promocion y posibilidad pa crece den e organisacion, ta importante. Den sector publico ta importante pa bin cu sistemanan manera “Pay for Performance”, asina empleadonan ta stimula door di e balor di e trabao eherci. Na di dos lugar, pa cu satisfaccion di trahadornan e aspecto di management ta importante. Empleadonan kier wordo scucha y kier tin e sentimiento cu decisionnan tuma ta tene na cuenta cu nan opinion y deseo. Tambe e resultadonan ta mustra cu ta importante pa empleadonan tin incentiva pa trabao bon haci.

Despues di un presentacion, Kathleen a defende su tesis den presencia di e comite di graduacion cu a consisti di drs. Judelca S. Briceno como supervisor di tesis y evaluado dr. Edward Erasmus. Drs. Cabenda, hefe suplente di Cuerpo di Aduana tabata presente como miembro externo di e comite di graduacion. E comite a elogia Kathleen pa su investigacion relevante, y su recomendacionnan constructivo. 

Den su tempo na Universidad di Aruba, y durante e proceso di su tesis, Kathleen a crece na un nivel academico y personal. El a desaroya su mes como un studiante ehemplar na Universidad di Aruba. Universidad di Aruba, particularmente e Departamento di Organization, Governance, and Management, ta felicita Kathleen cu e logro aki y ta desea tur clase di exito den su futuro carera. Pa mas informacion tocante OGM, bishita e pagina di Universidad di Aruba na http://www.ua.aw/OGM y e pagina di Facebook https://www.facebook.com/pages/University-of-Aruba-OGM-Organization-Governance-Management-FAS/