Diaranson 16 di October studiante di OGM, Giacomo Pais, a defende su tesis exitosamente den presencia di su famia y amigonan den Aula di Universidad di Aruba.

Giacomo su investigacion su enfoke tabata riba e tema di cultura y liderazgo den “Royal Netherlands Marine Corp (RNMC)” na Aruba. Giacomo a splica cu aspectonan manera cultura den un organisacion, e tipo di liderazgo y practicanan principal den un instituto ta importante na momento cu un organisacion kier stimula su empleadonan pa tuma posicion di liderazgo. 

E pregunta general di investigacion tabata: “Cua factornan di e cultura na RNMC ta contribui na e habilidad di e organisacion pa prepara su militar pa posicion di liderazgo?”. E resultado di e investigacion aki a demostra cu aspectonan manera proceso di socialisacion, colaboracion, posibilidad di promocion y un sistema transparente di liderazgo ta importante pa cualquier organisacion cu kier stimula su empleadonan pa tuma posicion di liderazgo.

Giacomo a acerca RNMC pa su investigacion y por medio di diferente interview cu diferente militar y oficial Giacomo a logra collecta e datonan necesario pa contesta su pregunta principal. Algun aspecto relevante di e investigacion a mustra cu a) e proceso di socialisacion na RNMC, na unda e militarnan ta wordo confronta cu e norma y valornan di e instituto na inicio di nan carera, b) e factor di “brotherhood”, c) e sistema herarkico, cual ta duna e militarnan e posibilidad pa ta na altura di e forma con nan por crece den RNMC y d) un estilo di liderazgo cla y transparente ta factornan importante na momento cu un organisacion kier stimula liderazgo.

Despues di un presentacion, Giacomo a defende su tesis den presencia di e comite di graduacion cu a consisti di supervisor di tesis drs. Judelca S. Briceño y e evaluado dr. Eduard Dresscher. Drs. Zulema Dabian, hefe di ‘Departamento di Foreign Economic Affairs and Business Development’ na Departamento di Asunto Economico Aruba, tabata presente como miembro externo di e comite di graduacion. E comite a elogia Giacomo pa su investigacion relevante, y su recomendacionnan constructivo. 

Den su tempo na Universidad di Aruba y durante e proceso di su tesis, Giacomo a crece na un nivel academico y personal. El a desaroya su mes como un studiante ehemplar na Universidad di Aruba. Universidad di Aruba, particularmente e Departamento di Organization, Governance, and Management, ta felicita Giacomo cu e logro aki y ta desea tur clase di exito den su futuro carera. Pa mas informacion tocante OGM, bishita e pagina di Universidad di Aruba na http://www.ua.aw/OGM y e pagina di Facebook https://www.facebook.com/pages/University-of-Aruba-OGM-Organization-Governance-Management-FAS/.

Comments

comments