Minister di Asuntu General, sr.Eugene Rhuggenaath, den su funshon di ‘opperbevelhebber’ durante un kalamidat, a reuní ku miembronan di ‘Vaste Rampenstaf’.
Esaki ta konsistí di e landelijke rampencoördinator, operationeel leider, landelijke rampencoördinator medisch, Korpschef i secretaris di Rampenbestrijdingsorganisatie. Tambe presente tabata algun ‘key stakeholders’ den representashon di Meteo i Krus Kòra Kòrsou. Tur e aktornan ariba menshoná, i otro organisashon, ta forma parti di e ‘Rampenbestrijdingsorganisatie’ di Kòrsou.
Meta di e reunion tabata pa para ketu na e preparashonnan ku Gobièrnu di Kòrsou ta hasi pa temporada di orkan, ku a start promé di yüni. A trata entre otro e diferente aspekto di e plan di kalamidat pa temporada di orkan. Durante e reunion a para ketu na e diferente ehersisio ku e ‘Rampenbestrijdingsorganisatie’ a drai e aña akí, pa entre otro prepará pa akomodá personanan den nesesidat i suministro di artikulonan di prome nesesidat.
Durante di e reunion a para ketu na e bon trabou ku ‘Rampenbestrijdingsorganisatie’ di Kòrsou a ehersé na St. Maarten na 2017, promé, durante i despues di orkan Irma. Tambe a enfoká riba e ròl importante di Krus Kòra pa loke ta trata asistensia den un situashon di krísis òf kalamidat.
A papia durante di e seshon di informashon, riba e nesesidat di prepará na tempu pa un orkan. Minister tambe a para ketu na e bon trabou i yudansa ku e empleadonan públiko di Kòrsou a duna St. Maarten promé, durante i despues di orkan Irma. Diferente oradó a splika tokante e aspektonan pa tene kuenta kune.
