Gobièrnu i sindikatonan ta ratifiká Akuerdo di Bramendi

82

Resultado di diálogo sosial bilateral tokante posishon hurídiko di empleadonan públiko Willemstad, 28 febrüari 2020 – Durante e reunion di e plataforma Centraal Georganiseerd Overleg in Ambtenarenzaken (CGOA) di djaweps 27 di febrüari 2020, Gobièrnu, representá pa Minister di Maneho di Gobernashon, Planifikashon i Servisio Públiko (BPD) sr. drs. ing. Armin Konket, i e presidentenan di e sinku sindikatonan representá den CGOA, esta ABVO, NAPB, SAP, STrAF i SITEK, a firma e asina yamá ‘Akuerdo di Bramendi’.

E ‘Akuerdo di Bramendi’ ta e resultado di negosiashonnan ku partidonan a hiba dia 29 di òktober 2019 unda nan a konkordá ku otro un lista di prioridat tokante temanan ku lo wòrdu trata den un periodo di seis luna den e plataforma di CGOA. Tambe partidonan a kumbiní un prosedura kon e diferente tema nan lo wòrdu elaborá. CGOA ta e plataforma di konsulta indiká, ku su base den lei, unda gobièrnu, representá pa e minister di BPD i e sinku sindikatonan ariba menshoná, ku ta uní den e Komishon Sentral di Sindikatonan (CCvV) ta negoshá tokante tur e asuntunan hurídiko di ámtenarnan inkluso e reglanan general tokante e maneho di personal. Mas informashon tokante di e akuerdo por wòrdu hañá riba e wèpsait www.cgoacuracao.cw