En konekshon ku dia Mundial di Tsunami 5 di novèmber awor, dos representante di gobièrnu (Meteo i Komunikashon) ta na Cartagena, Colombia pa un reunion tokante di tsunami e siman aki. E konferensia aki ta organisá pa UNESCO/IOC, NOAA i International Tsunami Information Center. E konferensia di tres dia ta pa elaborá tokante e sistema di alarma pa tsunami, kon pa usa e diferente produktonan pa Karibe i bisindario, pa por yuda pa tuma desishonnan efektivo i efisiente i tambe kon e kadena di informashon ta funshoná.

Atvertensianan pa un tsunami aworakí ta bai hopi mas lihé kompará ku algun aña pasá. Pa motibu ku e datonan, ku e diferente stashonnan sísmiko den nos region ta manda, nan informashon tokante di temblor pa e sentro ku ta duna atvertensia, denter di un minüt i asta ménos por detektá un temblor. Esei ta nifiká ku e instituto (Sentro Regional di Atvertensia pa Tsunami) por informá hopi lihé na e paisnan ku por haña un tsunami, despues di a hasi e kalkulashonnan tékniko. Esaki ántes tabata tuma vários ora. Si nan sa ki tipo di temblor tin, nan por dedusí si ta bini un tsunami si of no.

Un temblor mester ta por lo ménos di magnitut shete pa por okashoná un tsunami. E temblor na Hapon na mart 2011 tabata unu ku magnitut di 9.1 riba Eskala di Richter. Pa kalkulá kon grandi e tsunami ta bira ainda ta tuma 20 pa 25 minüt. Ta trata awóraki pa hasi esei mas rápido ainda, di moda ku por atvertí e paisnan hopi mas lihé. Ta hopi importante pa e paisnan duna tur dato ku nan por via di e Ret Sísmiko (650 stashon sísmiko den region, unu na Kòrsou) ku ta duna informashon.

Servisio Meteorológiko komo e instansia ofisial, den kaso ku registrá un temblor di un magnitut di shete òf mas den region di Karibe i tambe bou di oséano Atlántiko, lo saka un boletin di vigilansia pa tsunami (Kódigo Oraño), ora ku no ta sigur ainda ku un tsunami a wòrdu generá. Den kaso ku risibí konfirmashon di e sentro regional di atvertensia ku un tsunami lo alkansá nos kosta, lo halsa e nivel di menasa dor di emití un atvertensia pa tsunami (Kódigo Kòrá). Meteo Kòrsou i Departamentu pa Komunikashon & Informashon ta sigui traha pa informá mas tantu posibel tokante tur kos ku pueblo di Kòrsou mester sa di tsunami i su posibel efektonan, pero sigur riba tur loke individuonan mester sa pa por skapa su kurpa, ora tin un tsunami.

Comments

comments