Gobierno ta flexibilisa medidanan permitiendo mas hende den restaurantnan

2346

Awo tin 8 persona interna den hospital cu COVID-19 y tin 45 persona cu a fayece for di maart pa awo. Tin un averahe di 10 caso pa dia ainda na Aruba. Den cuadro di esaki, e mandatario a anuncia cu pa fin di aña caba Aruba lo haya e prome set di vacuna.

Esaki ta logra a base di palabracionnan cu tin den Reino.

Prome minister Evelyn Wever Croes a informa esaki den e conferencia di prensa di gobierno y na mesun momento a bisa cu e vacuna no ta obligatorio. Sinembargo lo bay hiba un campaña pa kita tur e preocupacion di ciudadanonan cu tin pregunta riba e efectonan negativo di e vacuna.

Gobierno ta flexibilisa medidanan permitiendo mas hende den restaurantnan

Gobierno ta flexibilisa medidanan permitiendo mas hende den restaurantnan. Click link pa mas https://24ora.news/3377VTy

Posted by 24ora on Monday, November 23, 2020

Tambe e mandatario a papia di e intencion di gobierno pa flexibilisa e medidanan cu tin vigente ainda. A bini cu diferente medida na momento cu e di dos ola di contagia a afecta Aruba den luna di augustus, pero a logra bah’e den dos luna di tempo cu cooperacion di comunidad.

Awo cu e situacion ta hopi mas controla, gobierno a dicidi di flexibilisa e situacion, e mandatario a bisa. Den e fase aki e mandatario ta spera cu toch sinti un poco mas di e ambiente di fin di aña, aunke e lo no ta manera antes mas.

E cambionan ta drenta na vigor diamars, 24 di november. Den famia ta permiti pa ricibi bishita di un grupo mas grandi, pero mester tene cuenta of aplica e reglanan di tapa boca y mantene distancia. Ta keda na cada famia pa mira cual ta e cantidad di persona cu por ta presente hunto y toch manteniendo distancia.

Un otro cambio ta referi na restaurantnan. Antes e medida ta encera cu no tabata permiti mas cu 4 persona na un mesa paden. E ta permiti awo pa 14 persona na un mesa paden y pafo por yega te na mesa di 20 persona. Pero tur hende mester ta sinta; no ta permiti pa sinta na bar.

Pa loke ta entretenimento e banda cu ta toca paden, e por consisti di maximalmente 5 musico, pero pafo e grupo por ta completo (gaita) y mester mantene distancia. Nan mester para e musica si e hendenan lanta para baila. E mester ta deleita e publico cu nan musica y no bailamento cu ta trece aglomeracion. Negoshinan por pone musica, pero e hendenan no por keda acumula.

Orario di cierre ta keda 11’or di anochi.

Taskforce a mira mehoracion den cumplimento di regla y comportacion di e hendenan. Comercio mes sa acerca Taskforce pa conseho. “E responsabilidad mester ta comparti pa nos vence. Clientenan mes ta coregi otro. Esey mester haci, corda cada ciudadano cu nan tambe tin un responsabilidad.”