Gobierno ta contradeci CAft: Ta sigui baha gasto di personal

Gobierno y CAft ta papia otro idioma! Di un banda Gobierno di Aruba ta informa cu gasto di personal ta sigui baha, mientras cu na juni ultimo ainda CAft a indica cu gobierno a aumenta e gasto aki cu 22 porciento compara cu e añanan prome cu pandemia! Kico Gobierno a haci despues di dia 24 di juni cu a causa un reduccion asina substancial, no ta bini padilanti den nan relato di prensa.

Gobierno:

Gobierno di Aruba den e ultimo añanan a bin ta baha gasto di personal di Gobierno. Esey t’e total di gasto di salario di tur esunnan cu ta traha den Gobiero. Na aña 2018, a presenta e plan “Beleidsplan Verlaging Personeelskosten” BVP, plan di maneho pa reduci gasto di personal. 

Por ehempel, ta stimula hendenan pa bay cu VUT, ora hende baha cu pensioen, no ta yena su vacatura, contractnan cu vence, no lo prolonga, etc. E unico aspecto di e BVP cu no por a introduci ta pa elimina e ‘periodieke verhoging’ ya cu pa esaki mester yega na consenso cu e sindicatonan. Mirando tur otro tema den discusion cu e sindicatonan, no a haya un momento oportuno pa cuminsa delibera riba esaki. 

RESULTADO DI BVP

Sinembargo, e BVP a duna su resultado. Por mira riba e tabel adhunto cu desde 2018 e gastonan a bin ta bahando. Tambe si no tene consideracion cu e recorte di 12.6% (marca den e area oraño/mas cla), por mira cu cada aña e gastonan a baha. Di 483 miyon florin na 2018 pa 467 miyon na 2022 – si no tabata tin e recorte di 12.6% – y ta proyecta pa sigui baha den 2023 te na 459 miyon. 

Pues por mira cu hasta si paga e 12.6% completo na 2023, e gastonan ta mustra cu nan ta bahando. “Por conclui pues cu e BVP a funciona”, Prome Minister a duna di conoce.

IMF

IMF ta aplica un otro norma. IMF ta mira e norma di 10% di GDP y ta recomenda e paisnan manera Aruba pa no surpasa esey. Aruba ta practicamente den cumplimento cu e norma aki tambe. Pues un otro confirmacion cu e BVP ta funciona. 

CAFT

E unico instancia cu nos tin diferencia di opinion cu ne, ta CAFT. CAFT ta di opinion cu mester mantene e recorte di 12.6%. Pa CAFT, e suma real di gasto na 2021, 418 miyon, mester ta e base y pa 2022 mester baha bou e 418 miyon. Aki nos tin un diferencia di opinion fundamental cu CAFT. Pasobra e recorte di 12.6% no ta permanente. E ta temporal, y empleadonan di Gobierno y fundacionnan tin derecho di haya nan salario completo bek cierto momento. E punto aki ta un di e 13 recomendacionnan di CAFT: pa NO duna empleadonan publico nan placa bek. Esaki ta un ponencia cu Aruba lo no acepta. 

SINDICATONAN Y OPOSICION

Algun sindicato y principalmente oposicion tambe a ataca Gobierno cu no ta cumpli cu e BVP. Manera por mira den e tabel, Gobierno ta cumpliendo cu BVP y e gastonan ta bahando. Minister President ta raporta riba e BVP cada aña den e Jaarverslag y Minister di Finansa ta raporta na Parlamento y CAFT cada kwartaal den e uitvoeringsrapportages. Ta importante pa tur hende tin e informacion aki, y pone e desaroyo aki den contexto. 

E problema di gasto di personal a sali for di man bou di e Gabinetenan Eman. Nan a tuma cantidad di persona den servicio. Desde cu Gabinete Wever-Croes ta na mando, e gastonan di personal a baha so. 

Minister Presidente actual ta traha cu 21 hende, siendo cu tempo cu Mike Eman tabata Minister Presidente, e tabata tin 147 persona ta traha p’e so. Esey a causa desconfiansa cu Hulanda, y e Gobierno aki pocopoco ta purba gana e confiansa bek, cu transparencia y cu determinacion.

CAft:

E presupuesto di 2022 ta mustra un deficit di financiacion di AWG 236 miyon pa e sector publico (4,2 porciento di e PIB). CAft a haci recomendacion na e presupuesto di 2022, cu particularmente ta vigila control di gasto. E gastonan pa “goederen en diensten” a aumenta den presupuesto cu 22 porciento en comparacion cu e añanan di prome cu pandemia, mientras cu no ta splica suficientemente e necesidad di e aumento considerabel di gasto aki.