Ta parce cu e siman aki, net prome cu Parlamento baha cu vakantie, Gobierno ta presentando cambionan fiscal tras di otro. Awe por lo menos dos a bira publico, un ta e aumento di deviezenprovisie y e otro ta trata extra documentacion ora di raporta winstbelasting. E ultimo no lo trece niun aumento di impuesto cu ne, sino e obligacion di presenta extra documentacion pa cu prijsnan di transferencia basa ariba palabracionnan international na cual Aruba tambe a compromete su mes.
Contrario na informe di “Noticia Cla”, mester aclaria cu deviezenprovisie ta un tipo di comision pa caha di Gobierno momento cu un ciudadano (“ingezetene”) ta haci un pago of transaccion for di su cuenta bancario sea na florin of un otro valuta. E ley aki lo por afecta companianan cu ta manda ganashi genera na Aruba, pa otro companianan, kisas nan compania madre (holding) den exterior. Ta trata aki di companianan cu ta rekeri un permiso di Banco Central pa haci dicho transaccion, por ehempel hotelnan of companianan multinacional. Awor aki caba nan ta pagando 1.3% y cu e aumento e lo bira 1.9% entrante dia 1 di januari 2020.
Con cu bay bin, e lo ta un aumento pa comercio y lo afecta e “cost of doing business” pero no cu e tin un efecto directo pa pueblo pa ora paga credit card of cumpra dollars pa bay biaha.
E cobransa aki ta sosode via Banco Central di Aruba, manera ta e caso awor caba. Den caso cu Bo transaccion no mester pasa Banco Central, di mes e ora no ta bin na remarca pa e comision aki. Den e ley di deviezenprovisie ta papia di un castigo maximo di 6 luna di prizon of un multa te na un maximo di 25 mil florin, den caso cu ta purba burla di e ley!
