Recientemente a anuncia e prohibicionnan di biahe relaciona cu e crisis di COVID-19 cu lo drenta na vigor proximamente. Ta prohibicionnan di biahe desde algun pais specifico pa Aruba. Ta paisnan unda tin brote di e virus aki y cu lo por forma un peliger pa nos comunidad. Na mes momento ta adverti ciudadanonan pa no biaha si no ta necesario!
E paisnan aki ta lo siguiente:
- China (incluyendo Hong Kong, Macao y Taiwan)
- Singapore
- Iran
- Korea (rep)
- Hapon
- Union Europeo
- Gran Britania
- Noruega
- Suisa
Personanan cu a bishita un di e paisnan aki ultimo 14 dianan no por biaha pa Aruba. E prohibicion aki no ta aplicabel pa pasaheronan residencia na Aruba (dus personanan cu ta biba na Aruba). E fecha cu e prohibicion lo drenta na vigor a wordo adapta un tiki y lo ta dialuna 16 di maart 2020.
Ta keda na e aerolineanan si nan ta continua cu e buelonan pa Aruba si of no. E decision aki ta depende di hopi factor, incluyendo factornan operacional, demanda y prohibicion di otro paisnan.
Pasaheronan cu ta purba bin Aruba bek desde otro pais of via otro paisnan (transito) por core e riesgo di keda pega na e pais di transito. Otro paisnan of aerolineanan por dicidi pa stop buelonan sin previo aviso. Personanan cu ta opta pa sali for di Aruba ta core e risico di keda pega den exterior.
Teniendo cuenta cu tur e factornan aki, ta suplica tur hende pa evalua, pensa hopi bon prome cu dicidi pa biaha pa exterior of pa bin Aruba bek. Ta conseha pa estrictamente no biaha si no ta necesario. Tene na cuenta cu seguro di biahe no ta cubri e pandemia di Coronavirus.
Gobierno di Aruba ta consciente cu ta un decision drastico, pero na mes momento ta convenci cu e ta un decision necesario na bienestar di pais Aruba den su totalidad y ta necesario pa por contene y mitiga e menasa di e COVID-19 virus, pa asina proteha nos pueblo lo mas tanto posibel.
