Gobierno ta absorba otro aumento di gasolin

Esaki ta di tres luna sigui cu Gobierno di Aruba, via di e compania estatal Refineria di Aruba, cu na su turno ta doño di Fuels Marketing & Supply Aruba (FMSA), ta absorba aumento den prijs di combustibel riba nos isla. Si tur cos ta bon, esaki ta e ultimo biaha cu e compania ta absorba e aumento, cu de facto ta ya ta core den miyones di florin caba. Sigui absorba lo por traduci su mes den debilitacion di e fondonan disponibel di e compania cu ta percura pa tene nos isla moviendo, avionnan bulando y WEB operando, pasobra e combustibel cu ta uza pa produci awa y coriente tambe ta bin di nan.

ADV

Minister di Finansas, Asuntonan Economico y Cultura, mr. Xiomara Ruiz-Maduro a anuncia awe merdia cu prijsnan di benta di combustibel entrante mañan 12 di mei 2019 lo ta:

  • Gasolin unleaded-premium: 209,5 cen p/ltr. (+/- 0,0 cen)
  • Diesel LS: 183,7 cen p/ltr. (-1,3 cen)
  • Kerosin: 171,7 cen p/ltr. (+/- 0,0 cen)

Na mes momento, Gobierno a confirma cu e prijsnan ariba menciona ta inclui BBO/BAZV/BAVP.

Di otro banda, si FMSA lo no a absorba e luna aki atrobe, anto e aumento lo tabata chikito, pasobra net den e ultimo siman e prijs internacional a baha drasticamente. Si lo a cobra normal pa e siguiente luna, e prijs di gasolin, cu awor ta “hedged” na 209.5 cen pa liter, lo mester ta 213.1 cen pa liter. De facto, FMSA e luna aki lo absorba casi 4 cen riba cada liter. E ta zona poco ora mir’e na “cen” pero ora conta cuanto mil liter di gasolin Aruba ta consumi pa luna, e ora ta realisa cuanto FMSA ta “perde di gana”.

Ta premira cu pa otro luna, ora cu mester baha atrobe, probablemente FMSA lo absorba e reduccion tambe, pero e ora pa cubri pa e lunanan cu nan a “wanta e sla” pa consumidornan. Specialmente e prome luna, si no tabata pa FMSA, gasolin lo a subi cu riba 15 cen pa liter!

Claro cu tur e decisionnan aki ta na nivel di e doño di FMSA, cu ta Gobierno di Aruba. Den caso cu Gobierno dicidi cu no mester recupera e sumanan perdi mas, e ora lo continua normal y RDA lo entrega menos dividendo na fin di aña na Gobierno, cu atrobe lo tin su efectonan riba e pronosticonan haci y entrega na CAft aña pasa pa loke ta entradanan di Gobierno pa aña 2019.

 

Comments

comments