Gobierno no ta sincero cu Sindicato FTA riba futuro di CITGO

Recientemente a tuma luga un reunion entre sindicato FTA y Gobierno di Aruba, cu e topico: Futuro di trahadonan den refineria CITGO. E sindicato, cu ta representa varios trahado cu ya traha sea directamente of indirectamente pa e refineria, no ta hayando contesta di CITGO riba kico ta pasando. Awor a resulta cu Gobierno tampoco ta
na altura di e ultimo desaroyonan, aunke cu e compania estatal Refineria di Aruba (RdA) a bishita ehecutivonan di CITGO varios biaha
na Miami e ultimo simannan. Ta mas cu obvio cu Premier Wever no tabata sincero cu FTA den e reunion!

E delegacion di Aruba a conta cu abogado mr. Hendrik Croes, tata di Prome Minister Evelyn Wever, cu a representa interes di RdA y Gobierno. Tambe a conta cu sosten di Junior Croes, primo di Prome Minister Evelyn Wever y ruman di Minister Glenbert Croes. Pues ta hopi straño cu e prome mandatario ta bisa e sindicato cu no sa di nada di CITGO.

Den e reunionnan extenso cu a tuma luga debidamente CITGO a informa e delegacion di Aruba cu dos famia direct di Prome Minister sinta na mesa na Miami, cu fondonan disponibel pa maneha e planta ta
cabando y cu RdA mester tuma over. Ya caba abogado Hendrik Croes a prepara un contract caba entre Gobierno di Aruba y CITGO den cual RdA ta tuma e operacion di e planta over, aunke cu e abogado di
Gobierno/RdA a inclui un paragraaf na ultimo momento cu RdA lo tuma e planta over of un otro compania apunta dor di Gobierno. Cu e palabra “extra” den e acuerdo por mira claramente e intencion di Gobierno pa
“outsource” e planta cu awor ta haciendo trabou di almacena combustibel pa FMSA cu ta bende cu stacionnan di gasolin, cu avionnan na Aeropuerto y cu WEB.

Premier Evelyn Wever- Croes a bisa despues di e reunion cu “Nan ta hopi preocupa cu e situacion actual y no ta haya claridad di nan doño di trabou riba e futuro di nan trabou na e refineria. Gobierno di su banda tampoco tin mucho informacion ainda. Nos ta den negosacion cu CITGO pero no tin nada concreto ainda. Nos lo percura pa busca e
informacion pa trahadonan ta miho informa”.

Hecho ta cu un delegacion di RdA a bay Miami varios biaha e ultimo lunanan aki. Hecho ta cu e negosacionnan ta cla di masha dia caba, pero ta internamente den RdA tin rancamento di siboyo riba cua rumbo ta tuma pa cu maneho di e planta, cu awor ta uza pa almacena producto so, sin produci nada. E plannan di Gobierno ta diferente cu RdA. E compania a emplea un Arubiano capas pa maneha e planta pa nan si acaso
CITGO cay afo pr falta di fondo pa por paga trahadonan. Pero Gobierno kier wanta e opcion habri pa traspasa e planta den man di un otro grupo, pues no RdA mes. E pregunta ta keda e ora, con ta sali for di e
contract cu CITGO. Den e contract ta bisa cu si Gobierno unilateralmente tuma e planta over sin mas, anto e ora automaticamente
e refineria no ta responsabel pa e miyones di dollar cu nan tin pone na Banco Central como garantia y tampoco ta responsabel pa haci e tereno limpi tampoco.

Gobierno como tal ta na un crusada masha peligroso awor, riba cua rumbo nan kier tuma cu e refineria. Mas cu solamente e cuponan di trabou cu por bay perdi debi na falta di likidez di CITGO Aruba, tambe mester tene cuenta cu e responsabilidad di CITGO cu awor tin chens di bay perdi, mescos e suma di placa disponibel pa Aruba si acaso CITGO no por cumpli. E ta mustra masha facil pero e asunto aki di e contract
entre Aruba y CITGO ta mas complica cu hopi ta imagina.