Prome Minister Evelyn Wever-Croes relaciona cu e inkietud cu tin bou di empleadonan den sector semi-publico pa loke ta trata e cortamento di salario, a haci un apelacion pa sigui ta solidario na esunnan cu a perde trabou y esunnan cu por perde trabou ainda.
Aña pasa ora cu COVID-19 a bati na porta, Gobierno a dicidi cu ta corta salario di empleadonan publico pasobra simplemente no tawata tin placa mas pa sigui paga. Den forma di solidarismo a pidi empleadonan publico pa duna nan contribucion pa asina Gobierno por enfrentra e retonan di e pandemia. A haci mesun peticion na empleadonan di e sector semi-publico cu en general ta gana hopi mas placa cu empleadonan di sector publico. A pidi nan pa mustra solidarismo pa asina yuda Gobierno enfrenta e retonan cu tin cu COVID. Aña pasa Gobierno a ricibi e cooperacion aki, tawata un muestra di solidaridad di empleadonan publico y semi-publico.
Empleadonan di semi-publico ta esunnan cu ta traha na companianan subsidia pa Gobierno y companianan estatal cu ta duna dividendo na Gobierno y cu ta sirbi un tarea publico. E aña aki cos a cambia y awor tin un grupo di empleado principalmente di WEB y Elmar cu no lo kier sigui ta solidario.
“Esaki sigur ta sorprende mi pasobra nos sa cu e crisis cu COVID a benta nos aden, ainda nos no a recupera di dje completamente. Nos a cera aña miho cu loke nos a spera recuperando 30% di nos turismo. Esaki kiermeen cu nos a perde 70% di nos turismo y entradanan pa gobierno. Ora un pais ta recupera na 30% so faltando 70% bo ta leeu di ta completamente recupera,” Prome Minister a duna di conoce.
Kico ta e resultado di e efectonan di COVID pa Aruba? Tin 11,650 hende cu a perde trabou y ta depende di FASE. FASE ta costa Gobierno 42.8 miyon florin te cu awor.
“Esaki ta e motibo pakico ta pidi esunnan cu ta traha na companianan estatal manera WEB, Elmar, Setar, RDA, FCCA, Banco Central, entre otro, pa duna Gobierno un contribucion di parti di bo salario. Gobierno ta pidi pa entrega 12.6% di bo salaris pa por yuda un cu a perde 100% di nan salaris. Cu e contribucion aki nan por haYa Awg 950.-.”
Tin tambe 19 mil hende cu ta depende di loonsubsidie esaki pa motibo cu nan doño di trabou no por carga cu nan salario mas cu consecuencia cu e hendenan aki ta core riesgo di perde trabou. Pa evita cu nan ta perde trabou, Gobierno ta duna nan doño di trabou un subsidio di salario pa asina nan por paga nan trahadonan y mantene nan na pia di trabou aunke ta cu un entrada reduci. E personanan aki a entrega 40% di nan salario pa na por a keda cu nan trabou. E loonsubsidie aki ta costa Gobierno Awg 271 miyon. Na FASE y loonsubsidie Gobierno a paga mas di Awg 300 miyon caba.
“Esaki ta e motibo cu nos ta pidi empleadonan semi-publico y di companianan estatal pa duna un contribucion di nan salario cu ta 12.6%. Hopi di esnan cu ta traha na e companianan aki ta gana mas placa cu nos mes como Minister. Kico ta 12.6% pa duna como solidaridad na e 11 mil personanan cu ta depende di FASE y e 19 mil hendenan cu nan trabou ta core peliger y ta depende di loonsubsidie.
Nos ta haci un apelacion un biaha mas na tur empleado di e sector semi-publico pa por fabor demostra na base boluntario bo solidaridad cu e personanan aki. Kico ta mas bunita cu esey. Esaki ta pa un tempo ainda, no por bisa cuanto pasobra e pandemia aki no a bin cu un manual ni cu fecha di vencemento. Nos tur ta den e insiguridad aki aki pero e bunita ta cu cada un di nos a base boluntario demostra e solidaridad na e 11 mil hendenan aki cu ta depende di Awg 950,- pa luna y na 19 mil personanan cu a entrega 40% di nan salario.
Sector publico a entrega 12.6% y minister- y parlamentarionan a entrega 25%. Nos ta pidi bosonan di sector semi-publico pa sigui coopera y yuda nos pa asina nos por bringa e crisis grandi aki y saca nos pais dilanti. Ohala aki un par di tempo nos por bisa nos a logra y nos a hacie hunto,” Prome Minister Evelyn Wever-Croes a enfatisa.
